Parke Nacional Aruba a inaugura su Centro di Cultivo riba Dia di Mama Tera

ORANJESTAD (AAN): Dia di Mama Tera, Fundacion Parke Nacional Aruba (FPNA) ta sigui cu su esfuerso pa conservacion di naturalesa cu e inauguracion di su Centro di Cultivo door di Minister Arends den presencia di team di FPNA y invitadonan.

   E Centro di Cultivo ta un inversion danki na fondonan di Prins Bernhard Cultuurfonds Caribisch Gebied y di donacion di Aruba Airport Authority. E proyecto aki ta un ehempel biba di e tema di Earth Day 2022 cu ta ‘Inverti den Nos Planeta’.

   Dia di Mama Tera ta un evento global pa demostra e importancia pa proteccion di nos medio ambiente. E tema di e di 52 Earth Day tabata pa ‘Inverti den Nos Planeta’, y tabata un yamada pa Gobierno y tambe sector priva pa contribui na proteccion, conservacion y sigur na restauracion di e estado degrada di nos naturalesa. Como individuo y como comunidad, nos mester reconoce e impacto cu nos tin riba medioambiente, ecosistemanan y biodiversidad, y ahusta nos manera di biba pa por garantisa un naturalesa diverso y resiliente pa futuro.

  Asina mes, e team di FPNA a cuminsa algun luna pasa pa traha riba e Proyecto di Centro di Cultivo cu siman pasa a worde inaugura. E Centro di Cultivo ta e curason di FPNA su Programa di Mehoracion di Biodiversidad di Flora y pa un Clima Resiliente. E lugar di trabao ta encera un banco di semianan, un workshop y un area pa cultiva mata, y un stacion di compost.

   Na prome luga, e banco di semianan lo worde utilisa pa sigura un cantidad di simia di mas cu 40 especie di mata y palonan nativo di Aruba y na peliger di extinccion. E semia nan lo worde uza pa cultiva mata pero tambe pa salvaguardia e existencia genetico di e mata y palonan den caso di un malesa.

   E lugar di trabao den e part yama como ‘Cas di Cultivo’ ta yuda hisa e probabilidad di fertilisacion y propagacion di matanan hoben nativo, mientras cu e area pa cultiva mata lo worde uza como un area pa nan crece y worde cuida un pa dos aña te cu e mata nan por sobrevivi den areanan di naturalesa protegi.

  FPNA su manera integra pa conserva ta pone su enfoke riba e proteccion, preservacion y restauracion di Aruba su biodiversidad unico y tin como obhetivo pa mantene y avansa e condicion y sostenibilidad di cada categoria di servicionan di ecosistemanan. E especie nan di mata y palo nativo escogí pa worde cultiva den e Cas di Cultivo ta basa riba nan scarsedad localmente y tambe nan balor ecologico pa especienan di fauna como Prikichi, Blenchi, raton di anochi, bei y barbulet. Cu e mata y palo nan escohi, FPNA lo hisa e biodiversidad y mehora e servicio di ecosistemanan. 

   E Centro di Cultivo lo tambe sirbi como un luga pa duna curso, bendemento di mata pa trece mas biodiversidad na hardinnan privado, guianan educacional, y oportunidad pa trabao voluntario pa e comunidad local y bishitantenan. Asina FPNA lo envolvi comunidad den nos lucha pa conserva Aruba su flora nativo.

   Siman pasa caba e Centro di Cultivo tabata tin su prome curso, caminda e participantenan di FPNA Junior Rangers Camp a yuda traha den e Cas di Cultivo, tambe tabata tin voluntarionan di e programa di Wings of Hope di e Aruba Airport Authority cu a yuda cu trabao den e Cas di Cultivo. Cu esaki nos tin ehempelnan concreto con miembronan di e comunidad por yuda na conserva nos naturalesa. 

   Dentro di e siguiente lunanan, e stacion di compost lo worde realiza bou guia di Compost Club Aruba y cu participacion di e comunidad. E stacion di compost lo worde uza pa recicla material organico pa gordura den un manera sostenibel pa crea matanan mas saludabel y robusto prome cu nan sigui nan bida den naturalesa.

   FPNA kier duna danki na Prins Bernhard Cultuur Fonds – Caribisch Gebied y Aruba Airport Authorities pa haci e proyecto bunita aki posibel. FPNA tambe kier gradici  tur e rangernan cu a yuda na construi e Centro di Cultivo aki. Esaki ta solamente e comienso y lo worde amplia den futuro pa un isla y naturaleza rico y diverso.

    FPNA lo sigui Inverti den Nos Naturalesa via e diferente programanan di monitoreo y restauracion di e areanan natural protegi, tanto terestre, costal y marino, pa por logra un futuro caminda nos ta disfruta di un naturalesa mas rico, saludabel y diverso. FPNA ta invita pueblo di Aruba pa Inverti den Nos Planeta, pasobra un futuro yena cu naturalesa, ta un futuro prospero pa nos tur.