ORANJESTAD (AAN): E miembro di Partido UPP, esta Booshi Wever, a mustra cu e ta kere cu ‘Trash 2 Cash’ ta un forma pa compinchinan haya ‘Cash for Trash’.
Segun Wever, recien el a nota con e makina di propaganda di e gobierno actual a cuminza draai pa un biaha mas desvia atencion riba e problema grandi cu Aruba ta hinca aden, pa motibo di mal gobernacion. Aki e ta referi con minister Ursell envez di dedica atencion di un forma profesional a dicidi di usa "Sprookjesverhaal" pa yena wowo di pueblo atrobe y na mes momento probecha pa yuda cierto compinchinan? Cu placa di pueblo a saca un pamfleta y te hasta un videoclip masha bunita y cu un nomber masha “catchy” mes, pa asina purba un biaha mas na manipula e pueblo, esta "Trash 2 Cash"!
Ora lesa e contenido di e pamfleta y mira e videoclip aki ta exactamente loke nos por a lesa tempo di e ex-minister, solamente esaki ta mas colorido y cu mas show. Pronto lo tin un "pitch" pa determina ken lo por na remarke pa haya e "cash"!
E asina yama "pitch" ta un procedura nobo pa "by-pass" nos ley di Comptabilidad? Mescos cu “prijsvraag” cu a bin pa un proyecto di “condominio pa pueblo” cu ta resultando den un farsa, ya cu e homber comun lo no por paga esaki.
Of e "pitch" aki ta e "pek" cu lo contagia e "happy few" cerca di minister of esnan cu semper tabata manera "samuro" rond di ex-Ministro? No lubida riba e verbo na Hulandes: "Wie met pek omgaat, wordt ermee besmet"!
Tempo di ex-Ministro tambe a haci comosifuera cu recycling lo bay genera placa y trabao. E unico placa e tempo di ex-Ministro cu reciclahe a trece aden na granel, ta pa e sponsor di dje, pa huur di un edficio na Pos Chikito y esun cu a print un hala di poster pa e edificio y e trucknan. UPP a critica e asunto aki severamente, pero ningun hende kier a tende! Fiesta a sigui. Y den e caso aki di “Trash 2 Cash” ta parce cu atrobe "the show must go on"! Den e “fabeltje” aki, tempo di ex-Ministro ta e pueblo a paga pa e gastonan, y esaki ta loke cu lo bolbe bay sosode. Esaki ta un "costly political dream"!
Ta na Aruba so nos tin politico cu ta keda kere e material recycla tin hopi balor y lo ta e solucion pa nos problema gigantesco di e maneho di desperdicio!
E realidad ta cu desde 2018 caba tabata tin un trend negativo den mundo pa loke ta “cash” pa e “trash”. Mientras cu recycling ta bon pa nos medio ambiente, e “profit” pa companianan di recyclahe no ta duna e resultado desea pa mantene e proceso aki, sin papia di un ganashi ainda pa esaki. Ehempel di esaki nos tin aki na Aruba mes, esta e compania Ecotech, cu un tempo tabata duna “cash” pa bo “trash” a stop di haci esaki, na momento cu e materia di reciclahe su prijs a baha drasticamente y na unda di otro banda e prijs di transporte (container) a aumenta. Y awor cu e situacion na Ucrania, esaki lo bira mas pio.
Ta bin acerca cu desde 2019 varios ta e paisnan, di cual China tabata un di e importadornan di productonan di reciclahe mas grandi di mundo, a stop di tuma mas desperdicio, influenciando e prijs negativamente. Tambe nos mester realisa cu nos ta un isla chikito, cu ta un otro desventahe, cu otro palabra, apesar cu nos tin un monton di desperdicio, esakinan lo no resulta di ta rendabel economicamente.
Den e pamfleta y e videoclip ta keda haci mencion cu e incinerator chikito ta funciona perfecto, cu te hasta e cadavernan y e desperdicio medico ta worde kima. Ya caba nos a mustra cu prueba cu ni e desperdicio medico ni e cadavernan ta ser kima den e porkeria cu a worde cumpra (incinerator chikito). Atrobe un mentira flagrante cu sigur no ta integro!
Den e pamfleta y e videoclip tambe ta menciona cu lo bin e asina yama "Waste 2 Energy". Esaki ta e manera mas caro pa genera energia. Sin papia mes cu den e caso di Aruba lo mester bay importa sushi for di otro paisnan. Tambe ta bin cu e pensamento cu lo por shredder e matanan etc. Aki un biaha mas mester trece dilanti cu na Aruba tin algo asina caba, pero a scohe pa pone e incenirator chikito den e edificio unda B&L tabata funciona y desmantela e planta di B&L.
Wever a bisa cu e ta spera cu pronto Ministerio Publico haci trabao di e denuncia di dje y persigui tur esnan cu a y ta scogiendo pa bira cara otro banda den e corupcion aki.
