Rainbow Warriors y plataforma NieuwBestuur a topa cu Premier Eman
ORANJESTAD (AAN): Con Aruba por involucra ciudadano, hubentud, organizacionan den sociedad civil, empresarionan y politica hunto structuralmente den e tomo di decision pa maneho pa e futuro di nos pais?
E siman aki, Promer Minister Mike Eman, Milton Ponson di Fundacion Rainbow Warriors Core y Mildred Hofkes, consultant independiente den gobernacion di e plataforma NieuwBestuur, specialisa den modelo resiliente pa gobernacion a largo plazo y dialogo cu stakeholders a papia tocante e tema con pa envolvi ciudadano den tomo di decision y maneho pa futuro.
Promer Minister Mike Eman a expresa su apoyo pa e metodo pa dialogo democratico nobo desaroya pa Hofkes cual ta enfoca ariba maneho a largo plaza y den forma entusiasma a expresa cu ‘Como Aruba nos ta bay p’e’.
Milton Ponson y Mildred Hofkes den e proximo periodo lo traha hunto cu diferente grupo (incluyendo sindicato, representante di hubentud, UNESCO, sector turistico, gremio comercial y organizacionan den sociedad civil) pa explora con innovacion den gobernacion por contribui na fortalece sociedad y democracia na Aruba.
E meta ta pa vincula cuestionan clave, manera turismo, calidad di bida, husticia social, medio ambiente y desaroyo economico cu un participacion democratico a largo plazo na Aruba.
