Vocabulario ta victima sigur di falta di control riba texto --- *Papiamento ta directamente mara na himno y bandera di Aruba --- *Papiamento ta distingui su mes como herencia cultural Arubano
ORANJESTAD (AAN) — Papiamento mester di mas defensa.
Esaki sin duda ta e conclusion na cual mester yega ora busca e motibo pa cual mundo a introduci un dia, dedica na e idioma di tur pais.
Ora papia di Papiamento ta papia di un idioma diferente di Papiamentu, cu sigur ta papia tambe di diferencianan cu tin den historia di islanan cu a forma Antia Hulandes.
Pa confirma loke nos ta presenta aki, por bay Hulanda caminda cada region tin su dialecto. Pero ora bati na porta di Friesland ta topa cu e provincia cu tin su Friese Vlag, cu bandera di Friesland, pero tambe su propio idioma, cu ta wordo reconoce como idioma.
Ora atende cu Papiamentu, e idioma oficial di Curacao y Bonaire, por descubri diferencia entre entonacion y cierto palabra na e paisnan. Pero e base di e idioma no ta esencialmente diferente manera si ta e caso cu Papiamento.
Ultimo tempo por tuma nota con mas y mas palabranan cu ta forma parti di e vocabulario di Papiamento, ta wordo reemplasa pa palabranan di Papiamentu.
Sumamente serio ta e erornan gramatical cu ta aumenta claramente ora tuma nota di textonan cu ta wordo presenta.
Papiamento no conoce “busk’e”. Continuamente por tuma nota di abreviacion den textonan na Papiamento, cu conoce e palabra “buske” deriva for di “busca” mientras Papiamento conoce e palabra “buska”.
Ta surgi otro problema. Buska na Papiamentu ta nifica “rondea” di Papiamento tambe.
Na e momentonan aki e motibo serio tras di hopi eror na Papiamento, ta falta di “spell check” pa Papiamento, cu a bira imposibel cu versionnan nobo di programanan pa traha texto cu computer.
Esaki ta haci cu cada rato e margen di eror cu Papiamento ta sigui aumenta den textonan hasta oficial, pasobra e persona cu ta produci texto, no ta ripara cu el a comete un eror, cu un “spell check” ta haci visibel.
E “spell check” ta rechasa palabranan cu ta wordo skirbi contra regla na un idioma.
Falta di e posibilidad pa control, sin duda a afecta e cantidad di eror cu ta presente den textonan na Papiamento.
Contacto riba programanan manera Facebook, tambe ta afecta idioma.
Falta di respet pa un Pueblo, su cultura, su historia, sigur ta hunga un papel.
E ponencia aki ta hiba nos directamente atrobe na e punto di salida, cu Papiamento mester di defensa.
Esaki ta hiba nos tambe na e punto cu idioma di un pais ta identificacion mara na himno y bandera.
Na momento cu Jossy Mehsen Mansur a dicidi pa e prome matutino di Aruba, e luchador pa Papiamento, a dicidi cu DIARIO lo mester a defende su idioma, su ortogragia, su gramatica y su vocabulario.
Awe pues ta deber di DIARIO pa pidi defensa pa Papiamento, cu ta e identifacion verbal di e Arubiano cu mester ta basa riba regla pa e representa e cultura, e historia, e identidad di e pais, cu a bira motibo pa e lucha pa Status Aparte, pa un bandera, un himno y un idioma di Aruba.
