ORANJESTAD (AAN)—Den conferencia di prensa di Fraccion di Partido Movimento Electoral di Pueblo (MEP), cu a tuma lugar Dialuna mainta, Parlamentario Ricky Hoek
a elabora tocante su bishita na e reunion di Parlatino unda a introduci e tema “Nauroderechonan” y a papia tambe di Inteligencia Artificial.
Hoek a duna di conoce cu desde dia 9 te 12 di Februari en curso, un delegacion di e fraccionnan di Accion 21, AVP y MEP a asisti na e reunionnan di Parlatino, cu a tuma lugar den e Ciudad di Panama.
E parlamentario a expresa cu Parlatino ta hopi importante, tanto pa America Latina como pa Region di Caribe. Den e reunion aki a bin dilanti cu mirando e pandemia cu mundo a pasa den dje y ta pasando ainda, Latinoamerica y Caribe ta e region cu mas a sufri di dje y cu den esaki mester papia di 600 miyon di habitante di e region aki, cu ta enfrentando problemanan socio-cultural, economico, financiero y politico.
Parlamentario Hoek a splica cu a bin dilanti cu awo mas cu nunca America Latina, Caribe y Parlatino mester ta uni pa loke ta trata e aspectonan ariba menciona.
“Mirando e aspecto socio-cultural cu nos ta bibando aworaki, nos por constata cu den nos isla e ultimo dianan, mirando fin di siman y e ultimo temporadanan aki, hopi violencia domestico ta sosodiendo, hopi abuso sexual, y hopi intimidacion fisico riba caya, na cas, na scol, y esey ta un sintoma hopi preocupante”, Ricky Hoek a expresa.
Hoek a subraya cu esaki, naturalmente, tin su causa y su raiz den e parti di e pandemia. Sinembargo, e ta sigui bisa, Parlatino tin atencion riba henter e region di America Latina y Caribe unda lo bay enfoca mas riba con por enfoca e casonan aki.
“Asina nos por mira cu un di e puntonan mas importante cu a bin dilanti den un di e charlanan tocante derecho humano y Ciencianan Politico, nan a bisa cu tin un topico yama ‘Neuroderecho’ Akinan, profesor Guido Girardi di Chile, a duna un presentacion hopi importante y sumamente interesante di loke ta ‘Neuroderechos’. Actualmente, Latinoamerica y Caribe tambe ta mirando pa futuro, y nos ta mira cu inteligencia artificial ta birando mas y mas den nos comunidad y tecnologia di awendia” Parlamentario Hoek a bisa.
El a agrega cu un di e puntonan importante ta, con na nivel regional di Parlatino, y tambe na nivel local di cada Parlamento riba su mes, ta bay trata e tema aki di “Neuroderecho”.
“Nos ta papia akinan di tecnologia cu ta avanzando y un inteligencia artificial cu ta bay tuma hopi di nos partinan cu por haci hopi trabao; sinembargo, nos mester bin cu leynan y esey ta un parti hopi importante di un Parlamento. Leynan legislativo pa controla con nos lo haci esaki, cu nos por haci uso di tecnologia y inteligencia artificial, pero tambe controla esaki y pone e derechonan di e sernan humano pa nan no excede y pasa di nan privacidad.
Parlatino tambe a scoge den su Asamblea Ordinario, un directiva nobo pa 2022-2024, cu lo bin cu mas informe y proyectonan cu nos lo traha riba dje”, Parlamentario Hoek a señala”, Parlamentario Hoek a indica y a conclui bisando cu Parlamento di Aruba lo sigui atende e reunionnan di Parlatino, mirando cu esaki ta un balor agrega tanto pa Aruba como pa e region di America Latina y Caribe.
