Prevencion bira e arma mas importante pa scapa bida y gasto impagabel - *Covid-19 a pone Salud Publico na top di importancia den maneho di pais - *Virus a bira les di bida ora Hulanda y Aruba a negocia asistencia financiero
ORANJESTAD (AAN) — Aunke e tabata mishi semper directamente cu bida y bienestar di hende, rond mundo e cartera di Salud Publico di cual Cuido Medico tabata parti, tabata haya un luga inferior den negociacion.
Asuntonan Financiero, Economia, Asuntonan Social sigur tabata haya mas atencion den tur gobernacion mundial debi na e peso politico cu nan tin.
Mundo no a para keto na e loke Cuido Medico ta nifica pa un pais, te na momento cu un simpel virus, a basha mundo abou.
Awe tur pais y mundo den su totalidad mester yega na reglanan gubernamental y den e base, e infrastructura nobo di e pais, Salud Publico ta ocupa un lugar central.
A keda demostra kico ta pasa cu economia si trahadornan no por traha dor di enfermedad.
Covid-19 a duna prueba cu mester di salario di e trahadornan y produccion di empresarionan y profesionalnan pa caha di gobierno yena entre otro.
E virus a bira les di bida pa politiconan hustamente den e tempo cu Aruba tambe mester a soluciona su situacion financiero y entre otro mester a busca un solucion pa entre otro AZV, un concepto socialista fantastico pero sin nocion di e responsabilidad cu tabata di sector priva cu pa haya voto Gobierno Henny Eman a haci responsabilidad y teritorio exclusivo socialista di Aruba cu un economia di mercado habri.
Na momento cu Aruba y Hulanda mester a confronta otro pa Covid-19, Hulanda a exigi pa Aruba baha su gastonan di sector di Salud Publico hustamente na momento cu Cuido Medico a bira un jackpot cu ta guli placa.
DIARIO no tabata y no ta di acuerdo cu Hulanda cu mester baha gastonan na forma substancial den Cuido Medico na momento cu Covid-19 a bira uno di e pesonan mas grandi di comunidad y ta influencia tur otro gasto.
Pero tin cierto aspectonan di Covid-19 cu si ta demostra con por yuda baha e motibo mas grandi di gasto di cuido medico, cu ta falta di prevencion.
Mientras mundo a bira mas moderno y mas chikito, el a wordo forza dor di e virus pa bolbe na tacticanan huicioso di hende di antes cu no tabata tin fondo Hulandes pa pone placa riba un cuenta bancario di e pais.
Aruba mester a bolbe na e base di preveni problema riba tereno medico. Hende a realisa na 2020, cu hende por ta peliger pa otro, loke ta un hecho cu tur enfermedad cu ta contagioso.
Prevencion a bira e palabra. Ora Toque de Queda a wordo introduci e sistema nobo di paranda tur dia a wordo elimina. E cantidad di accidente den trafico a baha.
Hende mester a mantene distancia y mester laba man. Hende mester a cera porta di cas ora solo baha y habri porta ora solo sali.
Prostibulonan a cera nan porta. Consumo di alcohol a baha. Reglanan nobo pa toiletnan na luga publico. Asina nos por sigui.
Antes hende a biba cu e pensamento cu preveni ta miho cu cura. Hende asina a evita pulmonia, enfermedad venerico y tur loke den un tempo cu no tabata tin pildo ainda, tabata mata.
AIDS a trata di splica algo, pero ni na un pais turistico manera Aruba, a logra haci hende comprende cu e tin su salud den su man.
Na caminda pa un comunidad renoba cu ta loke e normal nobo ta encera, Aruba mester baha su gastonan medico na forma practica.
Con peligroso ta pa cinco persona bebe for di un boter of glas? Con peligroso falta di higiena ta? Con peligroso tres sunchi di hende desaconoci ta?
Prevencion ta nifica regreso na normalidad.
Salud Publico mester duna atencion na loke a bay perdi den un comunidad “moderno” cu solamente kier a gosa di “moderno” pero cu preferencia pa sistemanan cu ta hiba hende na situacionnan primitivo.
Awe pa baha gasto di un comunidad riba tereno medico, no solamente mester papia di evita Covid-19 pero evita tanto enfermedad cu ta resultado cu hende a lubida e berdad di e naturalesa vulnerabel di hende, cu no por biba sin regla.
Asina tambe den e Acuerdo cu Hulanda pa Cuido Medico mester tin fondo y asistencia pa atende cu mas gasto dor di Covid-19 pero pa yuda baha gasto pa medio di prevencion.
