ORANJESTAD (AAN) – Jesseline Kelly, Relacionista Publico, y señor Rudy Webster, a hiba palabra den un conferencia di prensa, yama dialuna mainta, pa Departamento di Asunto Social.
Jesseline Kelly a cuminza, y a elabora tocante e ayudo financiero extra, cu ta bay wordo duna den luna di October venidero.
“Den luna di October ta bay wordo duna un ayudo financiero extra pa tur esnan den bijstand cu ta edad entre 3 te cu 24 aña, cu ta bay scol regular durante e dia. Scol regular kiermen scol basico, kleuterschool, middag MAVO, Scol Duna un Man.
E persona cu ta ricibi of cu tin derecho riba e ayudo aki, mester ta un persona cu ta ricibiendo e 250 florin tur luna, for di bijstand, y cu tabata riba e payroll pa bijstand di luna di September, e ultimo pago cu a tuma lugar Diasabra ultimo”, Jesseline Kelly a duna di conoce.
Kelly a sigui splica cu e ayudo financiero aki, ta consisti di dos parti: e prome nan ta yame “school uitkeuring” cual ta consisti di un suma di 220 florin pa cada mucha, te cu un suma di 800 florin maximo, pa cada famia. E ayudo aki ta wordo duna cu e siguiente pago di bijstand cu ta diasabra 9 di October. E di dos parti di e ayudo aki ta consisti di loke nan ta yama e “ouderlijke bijdrage” y e ta un suma di 120 florin pa cada mucha. Aki no tin un suma maximo pa famia, pero e suma di 120 florin y e suma aki ta wordo paga directamente na scol. “Esaki ta pa yuda cubri e gasto di contribucion di mayor na cada scol. Si ta importante pa bisa cu si e contribucion di e mayor na un scol ta mas caro cu 120 florin pa aña, ta e 120 maximo ta wordo paga; si e suma ta menos cu 120 florin, e suma cu e ta esey ta wordo paga. E ta hopi importante pa reitera cu e suma aki ta bay directamente pa scol, pues e famia no ta ricibi esaki den e pago di bijstand di October” Jesseline Kelly a señala.
El a agrega cu, naturalmente, tur esnan cu el a menciona tin derecho riba e ayudo, pero pa por haya y recibi e ayudo aki cada famia tin algun rekisito cu mester tene cuenta cune.
“Manera nos tur sa, scol a habri siman pasa Diaranzon, y desde e dia ey y e siman aki cada famia por pasa na nan scol y busca e formulario di Departamento di Asunto Social. Tin scol cu a hiba diferente maneho riba esaki; mi ta compronde cu tin algun scol cu a mail e formulario aki pa e mayor, pasobra tin di nan cu ta bay completamente digital, pa evita aglomeracion of cualkier otro motibo nan a dicidi esaki. Y mi tin cu remarca cu ora e mayor ricibi esaki e mester print’e, yene y mester bin entregue personalmente, na nos departamento, of por mail esaki pa DAS, pero toch mester acudi personalmente segun un schedule cu DAS a traha pa esaki.
