ORANJESTAD (AAN): Entrante 1 di Juli, prijs di pan lo subi. Esaki ta locual un di e panaderianan mas grandi di Aruba a anuncia diabierna.
Riba dia di eleccion e panaderia Bright Bakery a dicidi di bin cu e anuncio aki alegando cu e pandemia a trece cu ne aumento barbaro den tur tipo di producto y materia prima.
Alavez nan ta señala cu e demanda halto ariba rutanan di carga (container ships) cu a keda tranca, a haci cu e prijs pa transporte a subi drasticamente.
Bright Bakery y Aruba ta depende casi por completo di carga via container, y cualkier importador por confirma, cu flete di container pa Aruba ta birando casi impagabel. Nan a remarca tambe cu nan a haci tur esfuerso pa mantene e efecto financiero di e pandemia lo minimo possible.
"Cumpliendo cu tur nos obligacionnan, nos a logra tambe di no corta den salario y no hasi uso di e loan subsidie cu gobierno a ofrece. Pero, e gastonan ta sigui subi y a yega e momento cu nos no por absorbe esaki mas", asina gerencia a indica.
Teniendo na cuenta e aspectonan anterior, Bright Bakery ta informa cu entrante Diahuebs 1 Juli 2021, lo conoce un aumento den e prijs di nan productonan.
Nan a priminti si di sigui brinda Aruba henter nos productonan di calidad halto.
