ORANJESTAD (AAN): Durante un conferencia di prensa exclusivo, a anuncia acuerdo di colaboracion pa medio di un Memorandum of Understanding
entre PANA Foundation, Camara di Comercio, Ministerio di Asuntonan Economico, Comunicacion y Desaroyo Sostenibel y Universidad di Aruba pa desaroya y ehecuta un programa di Incubator.
Fundacion Pa Amor di Nos Aruba (PANA) a wordo funda na aña 2016 como Responsabilidad Social Corporativo di Pering Group.
Na 2021 e iniciativa a nace di PANA Foundation pa trece e plataforma global di Impact Hub pa Aruba. Impact Hub ta un organisacion global cu ta enfoca riba crea negoshinan mas resiliente y sostenibel pa asina crea impacto pa comunidad y planeta. Impact Hub Candidate Aruba ta wordo maneha door di PANA Foundation.
E MoU ta indica con e partidonan lo colabora cu otro como tambe e aporte den conocimento y fondo pa desaroya y ehecuta programanan di incubator.
Durante e conferencia di prensa, co-fundador Sr. Alberto Perret-Gentil a splica con e iniciativa aki a nace y e trayectoria cu a tuma pa establece Impact Hub Candidate Aruba. Impact Hub Candidate Aruba ta consisti di 5 co-fundador entrepreneurs, Sra. Mary-Ann Falconi-Rasmijn, Sr. Alberto Perret-Gentil, Sra. Layhing de Kort-Yee, Sr. Elthon Lampe y Sr. Gerald Tsu.
Cada un co-fundador ta trece nan area di experticio den e organisacion y di e manera aki yuda dirigi programanan y proyectonan na beneficio di comunidad.
Fundacion PANA ta gradici Presidente di Pering Group, Sr. Irwin Perret-Gentil, Minister di Asuntonan Economico, Comunicacion y Desaroyo Sostenibel, Sr. Geoffrey Wever, Presidente di Camara di Comercio, Sra. Monica Kock, Ruth Bonnevalle-Kok Decano di Facultad di Derecho di Universidad di Aruba pa sostene e iniciativa y colabora cu Impact Hub Candidate Aruba.
{gallery}PANA Foundation a cera acuerdo di colaboracion cu KvK, Gobierno y Universidad di Aruba pa un programa di Incubator{/gallery}
