Balor di $13,5 miyon
ORANJESTAD (AAN): E barco di marina Hulandes, esta Zr.Ms. Groningen cu aworaki ta haciendo colaboracion cu Guardacosta di Caribe Hulandes, a sa di dal un bingo grandi e siman aki.
Autoridadnan a confirma, cu riba e anochi di Diaranson 13 di Juli pa Diahuebs 14 di Juli, nan a intercepta un transporte di droga riba lama. E barco a logra di stop pazuid di Curaçao, un speedboat tipo Go-Fast den tempo record!
Pa colmo, e barco Zr.Ms. Groningen apenas algun ora prome tabata activo den un training, y nan a caba di subi bek riba patruyahe, ora cu nan topa cu e boto sospechoso. A splica cu e tripulantenan a haci e training na un forma exitoso. Directo despues di esey, ya nan a sali tras di un transporte di droga cu pa casualidad a pasa pazuid di Curaçao.
Despues cu a detecta e Go-Fast, a manda e barco Zr.Ms. Groningen y e helicopter di Guardacosta rumbo pa e area. For di Zr.Ms. Groningen, a saca dos speedboat special, esta FRISC, cu a mobiliza rapidamente pa duna e Go-Fast ordo pa e stop. Sinembargo esnan abordo a nenga di stop, y djis sigui move duro.
Esey a pone cu mester a los tiro di advertencia, y ora cu esey no a yuda, finalmente sniper a mik y destrui tur dos Outboard Engine di e Go-Fast. E ora si e boto a stop mesora.
Abordo a bin topa cu cinco persona, hunto cu un cargamento grandi di droga. Tambe a haya cuatro arma di candela abordo.
Un boto Metal Shark di Guardacosta di Caribe Hulandes a transporta e tripulantenan, cu e pakinan grandi di droga, y e arma pa asina hiba nan pa autoridad na Curaçao.
E sospechosonan y e contrabanda a wordo pasa na Cuerpo Policial di Curaçao cu lo sigui cu e investigacion.
E droga ta cocaina, y tabatin un peso total di 650 kilo. Esaki riba mercado na Merca tin balor di 13,5 miyon Dollar.
