Palabra cu wela/welo, tocante educacion di bo yiu

Ora un baby nace bida ta cambia pa e mayornan. E no ta mescos cu prome. Pero no ta pa e mayornan so a bin cambio, tambe pa e hendenan rond di bo.

Diripiente bo mayornan a bira di “mama y papa” pa “wela y welo”.  Ta un reto: bo mama y tata rond di boso, y abo y bo partner purbando pa maneha boso rol nobo: mayornan nobo. Con bo mester haci cu tur nan consehonan? E ta di mas? Of kizas bo no ta hayando nan conseho mes? Y e suegronan?

Cada famia ta diferente. No tin un set di regla y rutina cu ta pas pa tur famia. Ta importante pa ta consciente di e forma con bo famia ta funciona, cu tin bon comunicacion y un bon manera entre boso y boso mayornan pa anda cu e cuido y educacion di e yiu.
Aki tin algun tips pa yuda maneha e famia cu a bira mas grandi awor cu e baby tey:

• Sa loke ta bo expectativa.
  Di antemano papia cu bo mayor y suegronan di loke boso ta spera di nan ora e chikito tey. Esaki pa purba evita sorpresa y desacuerdo desagradable. Hopi biaha, welonan tin un idea caba di e forma y tempo con nan kier ta involvi cu e nieto/a, si nan lo babysit of no, cuanto biaha bo mester keda den contacto cu nan. Pero esakinan no necesariamente ta cuadra cu loke boso tin den mente. Pesey ta importante pa papia trempan.
• Keda den contacto.
  Ora welonan no tende di e nieto/a, nan por cuminsa preocupa. Nan ta mesun ansioso pa sa con ta sigui cu nan nieto cu abo ta cu bo yiu. Papia cu nan regular y conta nan di progresonan di e yiu. Si bo ta bira nervioso ora welo/a regularmente ta pasa inespera, bo por puntr’e pa laga bo sa prome. Tambe por laga e baby “papia” cu nan na telefon. Of, specialmente si nan ta biba den otro pais, internet ta un bon posibilidad pa mira/papia cu otro.
• 
  Papia prome cu welonan di loke boso ta spera di nan y despues haci palabracionnan cu ta aceptable pa tur. Papia cu otro na manera positivo, p.e.na lugar di bisa nan pa no bin den siman (pasobra e ora boso no tin tempo pa sinta cu bishita), laga nan sa cu den weekend lo ta great. Boso tin hopi mas tempo e ora ey. Bo mayornan lo comprende esaki pasobra nan mes a pasa aden tempo bo tabata chikito. Ademas ta importante pa abo y bo pareha tin tempo hunto pa sigui traha riba e relacion familiar nobo: e baby y boso.
• Sea flexibel.
  Lo tin momento cu welonan kier desvia di reglanan palabra, p.e no ta duna nieto cos dushi. Ora bo descubri cu toch bo yiu a haya un koeki, ta importante pa bo no reacciona fuerte. Pero purba yega otro “halfway”. Busca y palabra un otro alternativa pa e cos dushi cu no ta asina dushi cu e koeki, p.e. un fruta cu e nieto gusta.
• Bo mayornan tambe ta hende.
  Hopi wela y welo awendia ta hopi activo, ta traha henter dia, y tin nan propio actividadnan social. Tene cuenta cu no ta di mes cu e por yuda bo babysit ora bo pidi’e riba man. Of cu e no por bel bo di biaha back ora bo yam’e. No haya esaki straño. Tene cuenta cu nan bida druk, y planea delanta ora bo mester di nan yudanza.
• Na manera positivo fortifica nan.
  Nan por tin propio idea tocante lantamento y crianza di yiu, pero welonan ta stima nan nieto y kier e mihor p’e. Pesey ta importante pa mustra bo aprecio y gradicimento ora nan duna un conseho util, p.e. manera pa laga e baby saca respo of un cantica pa canta cu ne. Ora bo duna nan razon welonan ta menos inclina critica. Te ora nan mes bira mayor, hopi mayor ta realiza con duro nan mayornan a traha. Lo bo haci nan feliz ora bo mustra bo mayornan e reconocimento aki. Reconocimento y respet di ambos banda pa otro lo yuda bo famia completo sera mas na otro.

Trata na crea un bon relacion cu e welonan lo yuda boso hopi, pero tambe e lo beneficia e yiu. Por tin desacuerdo entre generacionnan, pero importante ta e relacion welo-nieto cu ta algo hopi special. Nan ta acepta otro cu e diferencia cu por tin entre nan y ta siña stima otro manera nan ta. Otro biaha cu bo mama of tata desvia di un palabracion, para un rato y pensa riba su manera di wak cos prome cu bo cai aden. Duna bo yiu y bo mayornan espacio pa nan por traha na nan propio relacion cu lo tin cu dura pa basta tempo cu ta bin. 

Fuente: “6 tips for setting boundaries with grandparents” –Education.com.
Pa informacion of pregunta por acerca Fundacion Pa Nos Muchanan - Cumana 2

Tel: 5834247/5880856 – Whatsapp: 6998900

E-mail: This email address is being protected from spambots. You need JavaScript enabled to view it. - Website: www.fpnm.aw