Pal Mundo lo reuni Ozuna y Elvis Crespo

DEN HAAG: E festival Latino y Caribense mas grandi na Europa, esta ‘Pal Mundo’, lo regresa e verano aki na Zuiderpark na Den Haag pa e di ocho edicion.

  Riba Diasabra 15 di Juli 2023, lo bay tin presentacion di e.o. Ozuna, Elvis Crespo, y Jowell & Randy.

   Compara cu e festivalnan di Pal Mundo di antes, e biaha aki e lo bay ta riba un solo dia.

   Cu e anuncio di e prome headliners, Pal Mundo un biaha mas lo atrae artistanan di formato mundial.  E festival pa hopi aña caba ta adelanta den su niche, y a hasta yega di trece como prome tambe Bad Bunny na Hulanda.

   Ozuna tambe pa hopi aña caba ta produci cancionnan na top di lista di cancion Latino, y su exitonan manera ‘Taki Taki’ y ‘Baila Baila Baila’ ta gran exito na Hulanda.  Un di e cancionnan grandi di Ozuna, esta ‘Criminal’ den colaboracion cu Natti Natasha, a logra di haya miyones di views.

   Elvis Crespo cu ta e cantante puertoriqueño mundialmente famoso, ta conoci pa e hecho cu el a populariza musica di merengue.  Cu hitnan manera ‘Suavemente’ y ‘Pintame’, Crespo a hunga un rol importante pa yuda musica latino penetra na Merca y Europa.

   E aña aki ta spera di lo ricibi 30.000 persona pa mira Pal Mundo.