Pakico Gobierno ta duna prestamo na studiantenan pa estudio mas avanza pa titulo di maestro of doctorado

Profesor Earney Lasten PhD MA MSC ta puntra:

ORANJESTAD (AAN): Profesor Earney Lasten a habri e siman papiando riba estudio mas avanza.

   El a splica cu educacion avanza ta un guia na nos pueblo y ta e manera mas adecuado pa nos hendenan crece cu un conocemento mas amplio. Educacion ta e yabi pa un desaroyo sano den nos mes hendenan.

   Gobierno di Aruba ta brinda nos studiantenan tur aña un prestamo cu e oportunidad pa continua nan estudio den exterior. Ora nos studiantenan termina nan estudio cu exito, Gobierno ta exigi pa nan debolbe e placa presta.

Tin un grupo di studiantenan cu ta bin na remarca pa ricibi di gobierno un prestamo pa sigui studia den exterior y na Aruba mes.

   E pregunta principal ta: Si Gobierno ta haci un inventarizacion pa sa cuanto y ki nivel di un profesional tin obtenible den sector priva y den sector publico. Kico ta bal si nos studiantenan ta haya oportunidad cu medio di un prestamo di gobierno pa continua cu nan estudio, pero na mes momento no sa si ora nan termina nan estudio cu exito, si tin trabao pa nan aki na Aruba?

   El a splica cu tin un grupo di profesional cu no por haya trabao den e ramo cu nan a studia y tambe no ta ricibi e nivel di salario cu ta cuadra cu nan estudio!  Profesionalnan ta keda cu lomba pa muraya, buscando pa un trabao, maske cu tal trabao no ta cuadra cu loke nan a studia.

   E pregunta ta: Kico mester sosode, Kico mester pasa, pa un profesional cu a termina su estudio cu e exito despues varios aña, ta bolbe Aruba, cu yen di energía pa brinda Aruba su experticio profesional, pa despues mester scucha cu e estudio cu e studiante a promove, no tin vacatura pe.

   Ora scucha esaki, e studiante ta drenta un depresion, ta puntra su mes, pakico mi a studia, pakico mi no por haya un trabao den mi ramo cu mi a studia?

   E situacion aki ta alarmante pa nos studiantenan y nos por bisa cu esaki ta baha e interes pa studiantenan ta desea di sigui nan estudio mas avanza.

   Nos hendenan naci na Aruba, ta desea semper pa ora nan termina nan estudio, bin Aruba back pa duna nan aporte pa e continuacion di un desaroyo sano pa Aruba su futuro. Pesey ta importante y necesario pa Gobierno di Aruba, haci posibel cu esnan cu a termina nan estudio, por haya oportunidad pa drenta e mercado laboral cu e estudio profesional cunan a termina.

   Segun Lasten, e ta di opinion cu ta necesario pa lanta un fundacion pa nos profesionalnan pa ricibi un voz den nos comunidad cu e meta pa nos por haya oído cerca esnan den sector publico y sector priva.