Prioridad 2025 di mundo cu for di 2024 ta prepara oficialmente pa guera
- “Liability” e responsabilidad ora ta haci negoshi ta peso creciente
ORANJESTAD (AAN) Manera na varios occasion DIARIO a trece dilanti, ya for di prome cu pandemia na final di 2019, a cuminsa prepara lectornan di DIARIO pa desaroyonan na 2025, cu a bira e aña cu na nivel mundial lo a bira entrada na un era mundial nobo.
Na 2020 mundo mester a reuni pa atende cu futuro di petroleo pero tambe cuminsa prepara pa e Era di Inteligencia Artificial, cu DIARIO a presenta den e serie di Era di A.I.” den cooperacion cu instancianan internacional.
Na nivel domestico, local, Aruba tabata lucha cu recuperacion di su situacion financiero prome cu Covid-19 y DIARIO a presenta rapportnan cu tabata indica cu 2025 lo a bira e aña di culminacion di desaroyonan cu lo a mishi cu e economia y asina situacion financiero mundial.
Loke 2025 a presenta na mundo no ta nada nobo y ta culminacion di problemanan cu prome cu Covid-19 a bati na porta a haya nan inicio, manera ya splica.
Inseguridad a bira e marca di 2025 na tur nivel, manera sigur e instabilidad den prijs di petroleo, ta sigui sostene te awe cu otro caida te bou 70 Dollar pa bari ayera.
Uno di e resultadonan di desaroyonan internacional, ta sin duda e actitud di publico, cu mas y mas ariba tereno internacional ta busca caminda pa Corte di Husticia pa soluciona su problemanan.
“Liability”ta nifica “responsabilidad” cu ta conta pa paisnan y negoshinan, manera publico y na nivel mundial cada rato ta bira mas comprendibel den e casonan cu ta wordo presenta dilanti Corte di Husticia dor di personanan y instancianan cu ta sinti nan mes perhudica dor di accion of falta di accion di otro persona of empresa, pero tambe mas y mas contra gobernacion of instancianan gubernamental cu ta faya sigur ariba tereno financiero.
“Liability” (responsabilidad) ta uno di e basenan di aseguro, cu ta aumenta den cliente cu ta asegura nan mes contra daño cu nan ta sufri pasobra un compania, un persona, un instancia y actualmente mas y mas gobiernonan no a haci nan trabou.
Ta esaki ta e motibo, cu DIARIO a bati y ta sigui bati alarma debi na e grado di instabilidad cu e segundo mitar di 2025 ta representa ariba tur tereno importante pa hende.
Peso di bida a aumenta na nivel internacional y e buskeda di derecho den tur situacion, a aumenta cerca publico manera casonan den Corte na nivel internaional, ta demostra.
Pa mira e realidad di Aruba, cu no ta depende solamente di su responsabilidad enfrente e poblacion, sigur mester mustra ariba e grado enorme di responsabilidad di tur cu na un forma of otro ta atende cu Aruba, instancianan, ciudadanonan, empresanan Arubano.
E caminda pa Juez a bira na nivel internacional, mas popular cu mas y mas hende cu ta busca nan derecho ariba por ehempel e pakete cu nan a cumpra pa bini Aruba pero tambe cualkier asunto cu directamente ta afecta nan bienestar.
Empresanan grandi y empresanan chikito mester ta prepara pa e forma cu publico mundial ta haci mas y mas uzo di “liability” cu ta bati na porta tambe di e persona cu ta dicidi di ofrece facilidadnan nan un turista cu no ta contento cu e loke e ta ricibi pa su placa inverti den loke a ofrece.
E riesgo ta existi pa Gobierno, cu tin responsabilidadnan basico di bon maneho di comunidad ariba tur tereno y ta keda responsabel pa tur loke ta mishi cu bienestar di un persona pasobra el a faya den su trabou.
Na nivel internacional por nota cu aseguro contra casonan den cual “liability” por wordo aplica, ta wordo uza dor di negoshinan grandi y chikito.
“Liability” ta e responsabilidad cu un persona ta asumi ora e bisa cu e ta duna servicio pero tambe pa e persona cu ta ricibi un servicio pero no ta cumpli cu su pakete.
Informantenan di DIARIO ta indica con mas y mas, clientenan ta entrega reclamo pa producto y trabou pa cual nan a paga pero no tabata segun nan satisfaccion.
Resultadonan negativo di un accion, mas y mas ta habri porta na nivel mundial, pa caminda pa Huez den casonan civil.
Mundo a cambia y ta sigui cambia. Responsabilidad a bira un porta pa garantia di e producto, servicio y trabou cu ta e base di un relacion.
Den un mundo insigur riba tur tereno, investigacionnan haci ta duna prueba, cu aseguro a bira e forma cu ciudadanonan, empresanan, instancianan oficial, cubri nan mes y den esaki sigur ta resalta e lugar cu Liability Insurance a bay ocupa pa atende cu incidentenan y accidentenan, cu resultado pa otro hende, cu sigur ta bira interesante pa un pais manera Aruba, cu ta biba di turismo den un situacion mundial marca pa preparacion continuo pa guera, problema climatologico y resultado di instabilidad manera acentua den prijs di petroleo.
