Segun Premier Mike Eman:
- Den su gobernacion anterior a baha BBO pero no a mira reduccion di prijs
ORANJESTAD (AAN) Minister Presidente, señor Mike Eman, den entrevista cu Matutino DIARIO, a expresa cu importante ta cu su Gobierno ta enfocando, na e momentonan aki, riba utiliza tur e posibilidadnan cu tin y crea espacio, pa duna e hendenan cen directo.
El a subraya cu manera gobierno a pone 250 florin riba Reparatie Toeslag, pa e pensionadonan, awor a pone e pakete di remedi completo cu tabata tin un reduccion di 60 miyon florin, cu gobierno anterior a haci, cual a kita for di pueblo, y cu tambe pueblo ta hayando bek, pa medio di e remedinan cu ta bira completo atrobe.
“Nos a caba di ahusta e bijstand. Kiermen, nos enfoke na e momentonan aki ta utiliza e entradanan cu nos por tin, pa e hendenan haya e cen directo. Na momento cu bo baha BBO, bo speranza ta cu e ta yega bek cerca e hende, pero nos experiencia den e gobernacion anterior, dia cu nos a bah’e di 3 na 1.5, tabata cu nos no a mira reduccion di prijs”, Minister Presidente Mike Eman a subraya, y a enfatiza cu e alivio ta cu gobierno ta duna e pueblo directo y e no ta depende di ningun comerciante, of supermercado, cu pasobra BBO a baha e producto no ta baha; e ora ey esun cu gana ta e comerciante.
