Hose Figaroa: “Dunador no por desvia di ley”
ORANJESTAD (AAN) — Den entrevista cu e lider sindical di Federacion di Trahadornan di Aruba (FTA), señor Hose Figaroa, el a splica c’un dunador di trabao por pidi e trahado pa traha nuebe ora pa dia, pero tin diferente forma di haci esaki, basa riba loke ley ta demanda.
Si e acuerdo cu doño di trabao tin cu su trahado ta stipula cinco dia pa siman, 8 ora pa dia, e por pidi e trahado pa traha 9 ora pa dia, pero e tin cu paga e ora mas aki como overtime, depende di e porcentahe cu ta aplicable e momento ey.
Figaroa a subraya cu no t’asina sin mas e dunador di trabao por pone e trahado traha mas cu 8 ora pa dia. Un otro posibilidad cu Ley ta duna, pero cu mester tene bon cuenta cu ne, ta cu bo por tin acuerdo di trabao ta cu e trahado por traha 9 ora pero e ora ey mester traha 4 dia pa siman pa un maximo di 36 ora den e siman ey.
Esey ta den caso cu e acuerdo di trabao ta specificamente, pa un hende traha cuater dia den siman, 9 ora pa dia.
“E ora ey, esey ta posible, pero den caso cu e personanan tin un acuerdo diferente, por ehemplo traha cinco of seis dia den siman, si bo bay pidi bo trahado traha mas di 8 ora pa dia, e mester wordo paga como overtime”, Figaroa a reitera.
E presidente di FTA ta sigui bisa cu e ley ta permiti pa duna time back, pero tin dos condicion mara a ley. Un di nan ta cu e time back aki mester wordo aproba door di e trahado. “Pues, como dunador di trabao bo no por bisa ‘na luga di paga bo den placa, mi ta paga bo den time back’. E trahado mester bay di acuerdo cu e prome condicion cu ley ta pone, y e di dos condicion ta cu por duna e mesun porcentahe lo a wordo paga cu e overtime den placa”, Hose Figaroa a señala.
Esaki ta nifica cu e dunador di trabao ta pidi e trahado traha un ora y e kier paga den time bek, si pa e ora ey e mester a paga 150%, por ehemplo, e ora ey e tin cu duna e trahado un ora y mey bek den time back. E no por desvia di e porcentahe di compensacion. Asina Hose Figaroa, presidente di FTA a indica.
