ORANJESTAD (AAN): Diasabra riba 28 di maart, myiones di hende, gobiernonan y empresanan lo paga lus pa un ora largo durante ‘Earth Hour’.
Riba e islanan lo paga lus tambe di 8:30 pa 9:30 anochi na diferente localidad pa pidi atencion pa naturalesa.
Impacto global
Earth Hour a cuminsa como iniciativa di WWF (World Wide Fund for Nature) y a crese como e movemento mundial di mas grandi pa proteccion di naturalesa. E aña aki ta celebra 20 aña di ‘Earth Hour’ y e islanan Caribense tambe ta participa. Cu cooperacion di Curaçao Ports Authority y Aqualectra, e area rond di Brionplein, Pontjesbrug, Handelskade y Gouverneurspaleis lo ta scur.
Na Boneiro, e Entidad Publico Boneiro y WEB Bonaire a uni forsa pa paga e lusnan di e cayanan den area di Wilhelminaplein, partinan di Kaya Grandi y Kaya N.E. Craane. Ademas, Tourism Corporation Bonaire, Elmar N.V. y Directie Milieu en Natuur na Aruba, y Entidat Publico na Saba lo paga e lus di nan edificio. Port St. Maarten lo desconecta e lusnan no-esencial di e brug di Causeway.
Mas cu paga lus
WWF ta invita comunidad y otro empresanan tambe pa participa na Earth Hour. Paga lus ta un símbolo pa pidi atencion pa naturalesa. Pero e participacion por bay mas leu cu e ora. E ta posibel pa haci algo positivo na bienestar di nos mundo. Esaki por ta por ehempel: uza awa mas eficiente, come mas cuminda vegetariano/vegan, recicla, planta mata, participa den un ‘clean up’.
Islanan mas vulnerabel
Participacion di e islanan Caribense na ‘Earth Hour’ ta mustra e dedicacion pa pone atencion na e consecuencianan di cambio di clima cu nos ta sinti mas y mas pa dia. Islanan chikito ta extra vulnerabel pa cambio di clima. Debi na subida di nivel di laman y mundo cu ta keitando, e chens pa tempo extremo manera secura extremo, inundacionnan pisa y horcan, ta hopi grandi. Esaki tin un impacto grandi riba economia di e islanan, bienestar y prosperidad di e poblacion. P’esey pa e motibo aki ta importante pa nos para hunto, reflexiona riba nos impacto y haci pasonan chikito den direccion di un futuro mas sostenibel.
