Minister Dangui Oduber
ORANJESTAD (AAN) – “Dia di Himno y Bandera ta un dia unda nos tur riba e pida barranca aki ta para keto pa recorda y celebra un gran logro. E ta e logro cu ta haci cu awe nos por bati riba nos pecho cu orguyo y bisa Ami ta Arubiano. Pabien pueblo cu Dia di Himno y Bandera!”, Minister Dangui Oduber ta desea pueblo di Aruba.
Pa e mandatario e dia aki ta uno sumamente special ya cu e ta un dia di union y cu ta demostra pa kico Aruba ta ser yama e perla di Caribe. Minister Dangui Oduber a splica cu hopi bes nos ta enfoca riba e turista pero no ta para keto riba locual ta haci Aruba asina atractivo: “E amor caluroso cu nos Arubianonan tin pa su bishitantenan.”
Ultimo 2 añanan tabata e 2 añanan di mas dificil den Aruba su historia, 2 aña cu nos no tabata por a celebra nos dia nacional manera ta custumber, pero pueblo di Aruba a demostra di ta uno resiliente. Nos a demostra cu ora nos ta uni pa un causa nos por logra cosnan sobre humano.
E mandatario ta desea pa tur hende gosa di nos Dia di Himno y Bandera. “Celebra e dia aki den grandi hunto cu famia y demas amistad, pero no lubida kico ta haci nos sinti orguyoso di ta Arubiano. Pabien Aruba.”
