‘Pabien na trahadornan di prison celebrando cu coleganan di Suriname, St. Maarten, Corsow  y Boneiro’

Minister di Husticia:

ORANJESTAD(AAN): Diabierna mainta durante un conferencia di prensa, minister di Husticia y Asuntonan Social Rocco Tjon a tuma tempo pa duna un pabien na tur e trahadornan di prison, mirando cu awe ta e dia oficial di trahadornan di prison, kendenan ta den pleno celebracion den e dianan aki.

“Nan ta eherce un trabao sumamente importante, no solamente pa e cadena judicial, sino tambe pa pais Aruba”.

Hopi biaha nos no ta para keto riba esaki.

Hopi biaha nos ta kere cu combati criminalidad  ta solamente haci un investigacion y percura pa e malhechornan wordo cera, pero e realidad ta cu si nos kier evita cu e personanan aki bolbe comete un error, ta importante pa e personanan aki por reintegra y re-socializa na un manera exitoso.

Esaki segun Tjon, kende a sigui bisa cu esaki por logra na e esfuerzo, e dedicacion y e sentido halto di integridad di nos trahadornan di prison, cu esaki mas y mas por bira exitoso.

“Di e banda aki nos kier gradici nan y desea nan hopi exito den e siman aki cu nan ta celebrando cu nan coleganan di St. Maarten, Boneiro, Suriname y Corsow cu ta akinan presente na Aruba”, segun e mandatario.