ORANJESTAD (AAN): Keto bay Glenn Thode ta presidente di Conseho Electoral, y lo tin e funcion ey tambe pa Eleccion 2021.
Ultimo simannan el a tuma nota di algun pregunta cu kizas ta inclaridad encuanto kico ta bay tuma lugar dia 25 di Juni 2021, cu ta eleccion na Aruba.
Durante un conferencia di prensa via Microsoft Teams, Thode a gradici tur hende pa e atencion cu tin pa e uso di medionan tecnico pa sostene e proceso electoral. E preocupacion aki pe, ta un señal cu comunidad ta realiza con importante cu nos electorado por bay urna electoral pa vota pa nan representacion den Parlamento.
Segun Glenn Thode, den eleccion venidero lo bay pasa den un proceso electoral mescos cu esun na 2017. Pero lo tin adaptacion di e cantidad di stemlokaal y sosten electronico riba tres punto. E adaptacionnan aki incluyendo e puntonan cu lo haya ‘Sosten Electronico’ a ser desaroya a base di recomendacion di Censo y Conseho Electoral despues di eleccion di 2017. Y e adaptacionnan aki ta bin debi na e pandemia di Covid-19.
Segun Thode, meta principal di e adaptacion ta pa evita cu lo tin contagio di Covid-19, y tambe soluciona cierto trancamento cu conteo durante eleccion 2017 y cu ta eherce hopi presion riba personal di stembureau.
E idea pa haci adaptacion cu Sosten Electronico, a wordo poni den un memo y rapport di Censo di 2019 caba, unda tin recomendacionnan haci a base di experciencia cu nan a haya di eleccion di 2017. E memo ta basa riba feedback e.o. di miembronan di Stembureau. Despues di eleccion di 2017, esnan responsable na Aruba a bishita otro pais tambe pa studia nan sosten electronico y a lesa multiple rapport di eleccion. E organizacion logistico di eleccion ta keda na encargo di servicionan cu tin rol den eleccion manera KPA, DOW y Censo. Awor cu tin pandemia, lo inclui tambe DVG y Crisis Team.
Conseho Electoral ta encarga cu registro di partido, supervision di e proceso legal pa participacion di eleccion, y tambe e resultado final, y traha pa e proceso cana su caminda full legal y neutral.
Pero pa evita cu tin menos ‘mishimento’ di mesun obheto, lo bay introduci un sistema electronico pa controla identidad y oproepkaart di e votador, y tambe un scanner pa yuda conta e voto.
Den otro articulo, DIARIO tin mas informacion amplio con e sistema di scanner aki lo bay funciona. E scanner por acepta un stembiljet cu maximo 11 partido politico riba dje. Si acaso pa eleccion di 25 Juni 2021 tin 12 partido politico ta participa, e ora lo no usa e scanner mas.
