DIARIO ta haya rason den tendencia politico pa forma bloke
*Democracia no ta gruponan minoritario cu ta uni pa haya poder
*Den tanto desempleo bira politico ta alternativa sigur cu placa Hulandes
ORANJESTAD(AAN)—Pa basta dia, DIARIO a adverti pa un tendencia di mundo politico na Aruba, caminda un grupo creciente di persona kier participa na eleccion 2021.
Cu sigur den un tempo cu tin menos espacio pa crece den empresa priva, e trap di politica lo a bira un inspiracion grandi pa crecemento personal, ta algo cu nos a spera.
Realidad tambe a pone nos bati alarma. E realidad cu ta indica cu ora problema grandi a bati na porta di Aruba, hopi a bay sconde tras di baranca incluso e persona cu na 2017 a bisa cu el a haya mayoria di voto.
Awe situacion a drecha na Aruba, cu a base di e acuerdo cu Hulanda hasta por tin placa den caha pa gasta, aunke e placa ta di Hulanda cu indirectamente por kibra dedenan cu mishi cu placa.
No mester hunga politica pa admiti, cu ningun hende a spera cu Gobierno di Evelyn Wever-Croes lo a logra keda na poder te awe. Pio ainda, poco a pensa cu tur loke Evelyn Wever-Croes a logra, tabata posibel.
DIARIO a duna Wever-Croes un oportunidad pa demostra su mes, mescos cu DIARIO na su nacemento a sostene e lucha legitimo di Betico Croes pa despues di su morto, ora Aruba mester a recupera di e crisis di Lago cu Venezuela a regala Aruba, a duna espacio na e prome gobierno di e pais pa Aruba por a traha riba e turismo cu ya a duna prueba cu e por a sirbi futuro di Aruba.
Esaki, sinembargo, nunca a kita for di nos bista y di nos palabranan e realidad cu e persona cu a keda for di su entrada te final cu e confiansa mayoritario di Aruba, tabata Betico Croes.
Nos mester menciona Betico Croes, pasobra e no tabata solamente e lider cu a entrega Aruba e futuro constitucional cu el a priminti cu ta Status Aparte, pero pasobra wega cu coalicion prome cu eleccion, tabata e unico forma pa su opositornan por a evita cu el a bira e prome Prome Ministro di Aruba.
Na 1985 nos a rechasa e forma cu partidonan a uni prome cu eleccion pa uza e hecho cu pa motibo di Venezuela Lago a cera, pa asina kita for di Betico Croes e puesto di lider di Aruba cu el a biba y muri pa logra.
No ta hopi tempo pasa cu nos a mustra cu actualmente tin algun partido chikito cu kier poder pero no por alcansa poder riba nan mes, kier scohe atrobe pa e formula pa deshaci di loke mayoria di Pueblo ta desea.
Forma un bloke prome cu eleccion no ta respeta e base di democracia cu ta e deseo di e mayoria di e Pueblo mester wordo respeta.
E ta un formula pa kibra democracia.
Si Pueblo kier un partido, e ta duna e partido e mayoria di voto.
Formacion di un coalicion despues di eleccion ta democratico pasobra tur partido ta keda cu nan base.
Na 1985 a keda demostra cu politiconan cu pensamentonan y hasta base completamente diferente a uni den un grupo pa bay eleccion, pa asina nan haya poder.
Resultado tabata cu no a tarda cu nan mes a percura pa uno di nan integrantenan wordo persigui dor di Husticia, nan mes a saca pia pa otro te ora finalmente AVP a base di redoblacion di turismo, a haya caminda pa cana.
Mentira no por carga historia. Mentira no por carga futuro pero ta spat for di otro na caminda.
E unionnan pa bay eleccion ta manera hende cu ta mara nan mes na cadena pa crusa Natural Bridge. Union pa haya poder cu Pueblo no a duna nan, aunke nan mester bandona nan propio principio.
Cu e desempleo actual nos por comprende cu hopi hende kier bira politico y kier haya puesto aunke Pueblo no kier nan.
E principio democratico tras di eleccion asina ta bira trampa pa minoria trapa riba mayoria.
