Pa loke ta aña 2025 KPA ta bay enfatiza riba seguridad den trafico: pa mehora y concientiza!

Vocero Policial Liliana Rasmijn:

ORANJESTAD(AAN) – Liliana Rasmijn, Vocero di Cuerpo Policial, den entrevista cu DIARIO a expresa cu enberdad aña 2024 a cu 13 morto den trafico na Aruba, y esaki ta e parti cu mas KPA kier mehora y concientiza riba dje.

Rasmijn a bisa cu KPA ta haci’e di tur manera. Hopi persona ta acerca nan, pa KPA por yuda cu un video clip cu nan tin, of algo pa concientiza e pueblo riba e riesgonan; e pakico mester core responsable.

“Nos ta welcome tur hende, nos ta traha bon cu tur hende, tanten cu ta e prevencion di algo asina.

Pa loke ta e trafico, enberdad nos mester cuminza baha man na loke ta e velocidad, e celular den man, hopi biaha bo ta wak hendenan, manera mi ta bisa, bo ta djis wak un rij contrario di bo, bo ta wak tur hende cabes abao pasobra tur hende ta bezig ta wak den nan telefon”, Rasmijn a expresa.

El a agrega cu nan ta yega un T-kruising, y envez di subi caminda bay, nan ta keda para pasobra esey ta un chens pa bo keda contesta un mensahe, un what’s app y esey tampoco ta bon. Ban ta conciente, ban ta responsable, pa nos ta importante e aña aki. “Un biaha mas nos ta keda enfoca pa loke ta e parti di trafico; nos tin hopi campaña, videonan chikito pa concientiza pa e seguridad den trafico. Y e factor mas importante ta baha velocidad”, Liliana Rasmijn a señala.

Vocero di KPA a sigui bisa cu vooral na Green Corridor no mag pasa 80 km/ora. Na Aruba no por pasa e limite di 80. “Ora bo yega un rotonde bo ta wak, facilmente, e borchi cu ta bisa bo cu mester baha velocidad, cu di 80 ta bay 60, di 60 ta bay 40, y cu bo ta yegando un rotonde y cu bo ta slow of  para completamente. Kiermen, bay ta un tiki mas responsable pa cu aña 2025 pa loke ta seguridad den trafico”, Liliana Rasmijn a señala.