Pa fin di aña FCVR por celebra reapertura oficial di nan sede

Segun Esther Broeksema:

Trabounan di renobacion ta cuminsa dialuna awo  

ORANJESTAD (AAN): Desde cu señora Esther Broeksema a asumi e cargo di Director di Fundacion Contra Violencia Relacional (FCVR), un di su prioridadnan principal ta optimalisa e facilidadnan di e shelter. Despues di constata cu e situacion a bira cada biaha mas preocupante, Broeksema a invita Minister di Asuntonan Social, e board di FCVR y Comision di Asuntonan Social di Parlamento pa bishita e shelter personalmente pa conoce e condicionnan existente. 

Broeksema a indica cu FCVR a aplica pa un subsidio special cu e meta di rehabilita e 16 unidadnan cu e fundacion tin disponibel pa acoge clientenan. El a enfatisa cu Aruba tin e intencion di ratifica e Verdrag van Istanbul. Esaki ta un tratado den un cuadro legal den cua un pais ta opera pa loke ta trata topiconan specifico di violencia di genero y domestico. 

Un di e criterianan entre otro ta cu e pais mester tin un unidad di shelter pa cada 10 mil habitante. El a remarca cu aunke cu Aruba tin 16 shelter y ta riba e bon caminda, ta esencial cu tin suficiente fondo financiero disponibel pa mantene e facilidadnan aki den bon condicion y garantisa continuidad di e servicio. 

Durante entrevista cu DIARIO, Broeksema a anuncia cu FCVR a ricibi e fondonan necesario di Gobierno di Aruba na luna di mei. Inmediatamente despues, e proceso di destaho publico a wordo inicia pa por cuminsa cu e trabounan necesario. 

Dialuna proximo, e contratista encarga lo inicia e renovacion di e shelter. Segun e planificacion actual, ta spera cu e trabounan lo por keda completa den aproximadamente tres luna. 

Broeksema a splica cu desde januari di e aña aki FCVR no por a acoge clientenan den e shelter. E expectativa ta cu, pa fin di aña, e fundacion por celebra e reapertura oficial di e facilidad y bolbe ofrece un luga sigur na ciudadanonan cu tin necesidad di proteccion y sosten.