Riba su website DIMP tin un guia aclaratorio:
ORANJESTAD (AAN) – Den entrevista cu DIARIO, directora di Impuesto Luenne Gomes-Pieters a splica cual ta e cartanan di obhecion cu contribuyente por entrega online, via e portal “Bo Impuesto”.
Directora di Impuesto a bisa cu DIMP tin un guia aclaratorio pa por facilita e contribuyentenan cu mas conocemento di e sistema di obhecion nobo aki, cu ta disponible riba DIMP su website, unda tin informacion amplio di kico ta importante pa e contribuyentenan sa, na momento cu ta bay entrega un carta di obhecion den forma digital.
DIMP a cuminza cu e prome fase y lo tin un di dos y di tres tanda cu lo wordo splica despues. Por wak cu poco, poco Departamento di Impuesto ta digitaliza su sistema, ta sigui innova no solamente pa por elimina e retraso pero tambe pa por facilita e contribuyente pa por atende cu su responsabilidad impuesto. “Nos tin basta trabao tras di lomba ora ta trata di digitalizacion, nos tin hopi bon feed back di e contribuyentenan cu ta mira cu esaki ta facilita tambe nan trabao, nan no mester para den rij, of entrega un papel cu nan ta kere cu por perde den e Departamento di Impuesto”, Gomes-Pieters a señala.
