Cabesante di EPB Erwin Lopez:
- Tin problema di bullying y di gang tambe
ORANJESTAD (AAN) – Cabesante di Scol EPB Oranjestad, a mustra, den conferencia di prensa, cu na e scol ta reina hopi preocupacion bao di docentenan y trahadornan, mirando cu nan ta haya arma den poder di algun alumno, ora nan ta haci research. Na scol tabata tin dos security guard, pero e no ta suficiente y mirando e cantidad di casonan, señor Erwin Lopez ta señala, mester e busca mas ayudo.
Como consecuencia di e situacion, esaki a crea inseguridad bao e docentenan y nan a papia cu e director prome ken a splica nan te unda e por yega y kico tur directie ta haciendo pa preveni e problemanan aki. Pero a yega momento cu e docentenan a papia cu e bestuur, cu di biaha a tuma accion y nan ta hopi contento cu esey.
Nan a logra papia cu e ministernan di Educacion y Husticia, y a logra haya dos securities extra pa yuda controla e tereno escolar y ademas, nan internet a wordo drecha.
“Nos ta suplica mayornan si, pasobra eynan nos problema ta sinta, pa papia cu nan yiunan. Nos mester ayudo di mayornan pasobra e problema social, no ta directamente un problema di scol. Nos ta bringa esaki tur dia, nos ta aporta di nos banda tur loke nos por cu e medionan cu nos tin, pero mayornan tin cu duna nos un man, pasobra nos so no por”, Cabesante Erwin Lopez a señala.
El a reitera y enfatiza cu scol tin hopi problema social mes, cu nan no sa mas kico pa haci, pero si tin hende ta sigui e conferencia di prensa, Facebook of e relatonan den prensa y haya un mal impresion cu e scol aki no ta bon, cu tin hopi pelea hopi peligroso, esey en realidad no necesariamente ta e caso. El a indica cu peleanan den cura di scol, nan por actua pero no tin autoridad ora ta trata pafo di cura di scol. Aki, tur hende den e sociedad mes tin e deber di para esey y yuda aporta na e situacion aki.
Cabesante Erwin Lopez a remarca cu tin hopi problema di bullying y di gang pafo di cura di scol.
“Polis ta dispuesto pa yuda nos. Nan ta investiga y haci controlnan rond di scol y den cura di scol, nos ta pidi nan baha, cana rond y yuda nos cu esey, y tambe nos sa cu polis ta bezig cu un plan mas grandi, pa ataca e problema di criminalidad y gangnan na full Aruba, pasobra e ta un problema den tur bario, di punta pa punta na Aruba”, señor Lopez a remarca.
