Pa como dos siman e cutter Panter a bay haci ehercicio den lama cerca di Puerto Rico

ORANJESTAD (AAN): Manera cu DIARIO a raporta recien, autoridadnan di varios pais den Caribe ta haciendo captura tras di otro e simannan aki, y gara cargamentonan grandi di droga cu ta cruza lama Caribe.

   Awor DIARIO a haya sa cu e Cutter Panter di Caribe Hulandes, a move temporal pa Puerto Rico pa hjaci trabaonan hunto cu US Coast Guard, specificamente e barco USCGC Donald Horsley.

   Durante di 3 di mei pa 14 di mei 2021 e cutter di Guardacosta di Caribe Hulandes, esta Panter a tene conhuntamente cu USCGC Donald Horsley, riba invitacion di USCG Sector San Juan Puerto Rico e operacion “Clockwork” riba lama cu e meta pa combati transporte ilegal via lama y reforsa e colaboracion entre e partnernan.

   E partnernan cu a traha hunto den e operacion aki ta e Joint Rescue Coordination Center di Guardacosta di Caribe Hulandes, tambe cutter Panter, e avion Dash-8, Sector San Juan Command Center, USCGC Donald Horsley y e U.S. Maritime Patrol Aircraft.

   Durante e operacion e cutter Panter y e cutter Donald Horsley a traha cerca di otro riba un nivel halto, comunicacion tabata excelente y cu ayudo di e Dash8 di Guardacosta di Caribe Hulandes conhuntamente cu e U.S. Maritime Patrol Aircraft a sa di amplia nos observacion den e region di U.S. Virgin Islands y e sector di St. Maarten, Saba y St. Eustatius.