Dia 24 di April, ta Dia di Fundacion Rancho:
- Conhuntamente cu “Fundacion InspirARTE Aain” di La Guajira
ORANJESTSAD (AAN) Director di Fundacion Rancho, señor Clifford Rosa, a subraya den conferencia di prensa, cu dia 24 di April ta un fecha hopi importante pa e fundacion, y nan kier tin un posicion den e Calender Anual di Aruba, pasobra e dia aki ta celebra Dia di Fundacion Rancho.
“Esey sigur nos ta bay celebra na un forma hopi creativo tambe, cual informacion mas detaya lo bin despues, pero lo bin cu un mini conferencia pa educa nos comunidad di tal forma, cu e ta compronde un tiki mas di su herencia.
“Nos kier clausura e cuartal aki, cu un tour di Fundacion Rancho, dia 29 di April. Un tour unico, pasobra nos tin añanan caba trahando cu nos Peninsula ruman, cu ta La Guajira, y nos kier tambe anuncia, oficialmente, cu e tema di e tour lo ta ‘Ban bek na raiz’.
‘Bay bek na raiz’ ta hopi importante, mirando e cantidad di descendientenan Guajiro cu nos tin na Aruba, pero tambe e relacion cu nos tin cu comercio, cultural y di diferente forma; y sigur, e relacion diplomatico cual lo mester haya su atencion enormemente. Pues, ‘Ban bek na Raiz’ ta un tour cu Fundacion Rancho ta organiza, hunto cu un fundacion di La Guajira, Rio Hacha, cu ta ‘Fundacion InspirARTE Aain’ di nos Colega Maria Isabel Cabarcas. Tambe cu Embahada di Reino, na Bogota, nos ta creando ahora oportunidad di haci un charter pa sali for di Aruba pa Rio Hacha, y asina nos por hiba hopi di nos hendenan den e tour aki, p’asina ey nos por celebra den union, un momento historico”, director di Fundacion Rancho, Clifford Rosa a conclui.
