Pa 2023 e cifra di Desempleo a baha te na 4%

Minister Glenbert Croes a anuncia:

ORANJESTAD (AAN) – Den conferencia di prensa di Gobierno, Dialuna 28 di  April, Minister di Labor, Asuntonan di Energia y Integracion, señor Glenbert Croes, a duna informacion tocante e tema di labor, specificamente desempleo cu a baha drasticamente.

El a cuminza bisando cu despues di a celebra Dia di Rey, e ta anticipando e celebracion di Dia di Labor, dia 1 di Mei. Como Minister di Labor, e kier a referi y mustra cu grafico, con desde Gabinete Wever Croes I y II, a asumi e cargo den gobernacion di nos pais, e cifra di desempleo a desaroya.

“Boso por a weita con desde dia cu nos a tuma e responsabilidad di gobernacion, e desempleo na 2917 tabata 8.9%. Nos a cuminza traha, pone man na obra como Gabinete Wever Croes 1. Na 2018, e cifra di desempleo a baha na 7.3%, nos a sigui pone man na obra, y na 2019 e cifra a baha na 5.2%. Lamentablemente, Covid 19, e pandemia, a dal nos duro y desempleo a bolbe subi na 8.6%. Y, ami lo bisa cu toch ta un cifra cu por tabata peor si no tabata e fondo pa subsidio di salario na comercio, e fondo di asistencia social di emergencia, si no tabata pa tur e ayudonan humanitario cu a tuma lugar, e apoyo na companianan mediano, chikito, tur loke a wordo haci pa Cruz Cora, Fundacion pa Nos Comunidad, esfuerzo sobre humano cu a wordo haci na Aruba, e  cifranan di desempleo lo a bira peor, pero el a keda na 8.6%”, Minister Glenbert Croes a subraya.

Aunke realidad ta cu na 2021 el a subi un poco, esta 8.8% pero na 2022, door di e recuperacion economico y e “fuel” cu ta pusha e motor di Aruba su recuperacion economico, cu ta nos industria di turismo, e cifra di desempleo a baha na 4.8 %.

“E ultimo biaha cu nan a registra e desempleo den e tempo moderno e tabata na 4.8 na aña 2000, el a baha na 4/3% y e no a bin su so, sino na e empeño di pone nos yiu di tera prome na trabao, pone nos hende local prome na trabao, claro cu un politica di integracion, pa esnan cu tabata fisicamente akinan caba haya oportunidad pa legaliza, y nan mes a aporta na caha di belasting, SVb, AZV, cu e economia Arubiano, pero semper cu e premise cu nos politica laboral y  integracion, ta pa pone nos yiunan di tera prome na trabao.

Awe mi kier anuncia cu e cifra oficial di desempleo, cu no tabata conoci, pero awo a bira conoci, ta sigui baha. E desempleo pa 2023 ta 4%.