ORANJESTAD (AAN) – Minister di Finanzas Xiomara Maduro, tambe a hiba palabra durante e conferencia di prensa extraordinario, convoca pa Gobierno Diabierna mainta.
E mandatario a elabora tocante e procedure cu gobierno ta bay encamina na Aruba mes, relaciona cu e zienswijze (punto di bista) di gobierno encuanto e 'aanwijzing', mientras cu ya caba nan ta encaminando e procedure cu Hulanda, pa asina convence nan pa kita e 'aanwijzing' for di mesa.
Minister Maduro a menciona cu ta asina cu gobierno ta trahando, y a keda trahando semper riba tur loke ta e parti financiero y e procesonan normal, den e ciclo presupuestario di Aruba.
El a bisa cu ta asina cu normalmente, ta conoce un cambio den presupuesto, mas na fin di aña, pero debi na e situacion cu aworaki a surgi, e debate cu a bay bin hunto cu CAft, consehonan cu a wordo duna, y aworaki cu ta wak e menazanan pa un 'aanwijzing', instruccion, of KB, manera cu ta wordo yama, locual awo ta acelera algun proceso presupuestario.
Minister di Finanzas a indica cu den esaki, nan ta trahando riba un cambio den presupuesto 2022, cu mester bisa cu ta practicamente cla, e parti for di Gobierno y cu mester cana awo su caminda pa e por haya su bachi huridico, y tambe pa e por bay na locual ta Raad van Advies pa e por haya su conseho y mescos na CAft.
“Den e cambionan akinan mi por bay adelantando cu e deficit lo wordo baha. E deficit cu nos tabata conoce na 2022 tabata na 227 miyon florin, ekivalente na 3.9%, relata na nos GDP. Y nos ta mira cu, cu e cambio e lo baha cu 79.3 florin y e lo bay na 148.1 miyon, ekivalente na 2.5%.
Pues, cu esaki mester bisa cu ta un mehoracion di e deficit y mester bisa si, cu Aruba a traha na un manera hopi serio, sigur den e tres añanan aki cu a pasa. Tres añanan den un pandemia nunca antes conoci na mundo cu a afecta nos pais grandemente. Y asina mes, bo ta mira cu nos ta core di un deficit di 1029 miyon florin, na 2020 door di e pandemia, y despues ta wak cu el a bay na 585.5 miyon florin na 2021 unda ta wak cu pais Aruba ta bin ta recupera na 2021 y cu e recuperacion na 2022 ta uno grandi, pero ainda nos no a yega na nivel di prome cu pandemia, esta di 2019”, Minister Xiomara Maduro a subraya.
E mandatario a remarca cu Aruba ta coriendo cu un deficit di 148.1 miyon florin. Minister di Finanzas a reitera cu Gobierno di Aruba a traha cu hopi seriedad y ta bon pa señala cu otro siman gobierno lo entrega na Parlamento di Aruba, locual ta conoci como un 'najaarsnota' y eynan ta cuminza duna splicacion kico ta e cambionan cu ta wordo haci pa cu presupuesto 2022, unda ta mira cu tin un subida di entrada, gastonan ta baha, y esakinan tur hunto, y lo splica specifica y adecuadamente, na unda ta e camindanan cu e cambionan ta presenta pa asina por produci un reduccion di e deficit di 79.3 miyon florin.
