Minister Presidente Evelyn Wever-Croes:
*Aruba a haya tempo pa traha riba e 'zienswijze'
ORANJESTAD (AAN) – Gobierno a convoca un conferencia di prensa extraordinario, Diabierna 26 di Augustus ultimo, unda cu Prome Minister Evelyn Wever Croes, y Minister di Finanzas y Cultura Xiomara Maduro, a hiba palabra.
Premier Wever-Croes a inicia e rueda di prensa, bisando cu mas trempan mainta a tuma lugar un Reunion di Conseho di Minister di Reino, na Den Haag, Hulanda.
E dignatario a declara cu manera el a anticipa, no tabata tin un decision riba 'aanwijzing' pa Aruba. Manera e procedurenan den nos leynan ta stipula, den caso di duna un aanwijzing, prome cu duna esaki e pais mester duna un reaccion oficial cu nan ta yama un 'zienswijze' (punto di bista), y gobierno ta den e proceso ey.
Pues, Aruba a haya tempo pa traha riba e 'zienswijze'. Segun e dignatario a compronde e tema di aanwijzing y zienswijze Aruba ta riba agenda di Conseho di Minister di Reino di October.
“Den e zienswijze cu nos ta trahando riba dje, nos ta bay den tur aspecto pakico nos no ta di acuerdo cu e conseho di CAft, no solamente pa loke ta trata e parti tecnico, pues financiero, pero muy specialmente e parti huridico pakico no por pone un 'aanwijzing' aworaki”, Minister Presidente a señala.
Prome mandatario a agrega cu gobierno ta trahando riba esaki, cu un Hurista cu ta un profesor Constitucional di Hulanda, y cu ta duna gobierno di Aruba tur razon den su puntonan. “Y nos tin tur confianza cu nos lo sali afo cu e cambionan cu nos ta haciendo caba”, Minister Presidente a expresa, indicando cu Minister di Finanzas lo elabora riba e cambionan aki.
Minister Presidente a agrega cu, cu esaki lo trece un trankilidad bek den comunidad, pasobra hopi hende tabata pendiente; nos a ricibi hopi mensahe di sosten, hopi hende tabata a haci oracion pa gobierno y a desea nan hopi forza. “Den e momentonan aki nos ta bon, nos ta bayendo riba e bon caminda”, e mandatario a remarca.
“Claro, si nos por a evita tur e situacion aki di 'aanwijzing', nos lo a hacie. Nos lo a haci tur nos esfuerzo pa evita cu e ta yega asina leu, sinembargo, esaki ta procedurenan normal y nos ta preparando pe na e momentonan aki” e dignatario a subraya.
