ORANJESTAD (AAN): Otro siman, dia 17 di december ta bay tin na Biblioteca Nacional pa 6 or di anochi, un encuentro literario 'Autor ta topa lector, lector ta topa autor'.
Relaciona cu e actividad aki, Linguista Ramon Todd Dandaré a duna di conoce cu esaki ta e di prome encuentro literario di un serie cu lo bin despues.
El a agrega cu a invita 6 autor di Aruba cu ta bay ta presente cu ta Sra. Olga Buckley, Sra. Desiree Correa, Sr. Quito Nicolaas, Sr. Wim Rutgers, Sr. Jossy Tromp y Sr. Frank Williams.
Sr. Rutgers lo tene un charla introductorio tocante kico ta literatura, literatura arubiano na Papiamento y con esaki ta para cu su calidad y su cantidad, Todd Dandaré a indica.
Ta bay tin un panel literario conforma pa Sr. Joe Fortin, Sra. Joyce Pereira y Sr. Ramon Todd Dandaré cu lo bay entrevista y dialoga cu e autornan.
Comunidad di Aruba ta invita pa participa di e encuentro literario aki na Biblioteca Nacional Aruba otro siman diamars 17 di december.
https://diario.aw/categories/noticia/general/otro-siman-tin-encuentro-literario-na-biblioteca-nacional#sigProId6e317efae3
