Robby Rosel di Bureau City Inspector:
ORANJESTAD (AAN): Vocero di Bureau City Inspector (BCI), Robby Rosel a indica cu Dialuna proximo un team ta bay sinta den un reunion pa asina analisa y yega na un areglo riba kico lo sosode cu e contratistanan chikito pa motibo cu ya caba ta bira e di seis reclamo cu BCI ta haya di contratistanan chikito cu ta tira desperdicionan den mondi of cu ta bay tira desperdicionan caminda cu no ta permiti.
Bureau City Inspector ta controla nan via di Ecotech of Serlimar, si nan tin bakinan of si nan tin espacio cu nan a paga pa nan tira e desperdicionan.
Si esey no ta e caso, e ora BCI lo cuminsa tuma accion pasobra tin cu cuminsa atende cu e problematica aki pa asina trata di mantene Aruba limpi, asina e vocero di BCI, Robby Rosel a declara.
