Francis Saladin di Comerciantenan Uni Aruba:
*Nan ta desea un rectificacion di Minister Maduro
ORANJESTAD (AAN): Francis Saladin, di Comerciantenan Uni Aruba (CUA) a referi na un punto cu recien el a trece dilanti indicando cu comerciantenan uni no tin confiansa den Departamento di Impuesto.
El a indica cu nan a haya hopi reaccion y pesey e kier a clarifica y reacciona riba un publicacion di Minister di Finansas.
Pa clarifica, a bisa cu nan miembronan ta trece nan preocupacionnan dilanti y nan ta haya documentonan cu pa 5 aña ta bay bin cu Departamento di Impuesto relaciona cu placa cu mester haya bek of riba bezwaar.
Un proceso cu ta dura 5 aña, a remarca, y e comerciante chikito cu mester haya 5 mil, 10 mil, 20 mil florin bek, con duro esaki ta, a expresa.
Saladin a sigui bisa cu un comerciante grandi toch tin mas lomba pa wanta, pero un comerciante chikito ora cu DIMP no debolbe 5 mil florin bek, esaki ta duro.
"Ora nos haci un expresion ta pasobra ta un preocupacion cu ta bin dilanti di nos miembronan", a señala.
Toch nan ta contento di wak cu DIMP a saca informacion bisando cu nan ta trahando riba retraso y CUA ta aplaudi esaki y e esfuerso pa rectifica e problema cu nan tin.
Pero ora CUA trece algo dilanti e no ta un atake. Akinan ta unda e ta bay reacciona riba Minister di Finansas cu ta papia comosifuera cu CUA a ataca DIMP. "Acaso nos no mag di trece nos expresionnan. Nos no mag di expresa locual nos miembronan ta trece dilanti, na unda cu mi ta mustra cu nos tin rason, pero danki Dios nan ta trahando pa soluciona esaki".
Francis Saladin a indica cu Minister di Finansas a sali publicamente ataca CUA personalmente relaciona cu e declaracionnan haci. Nan no sa si ta un menasa of cu kier spanta nan door di bisa cu "djis imagina si e 215 empleadonan di DIMP mester tuma e atake aki na serio y no bay cumpra nada mas cerca e miembronan di CUA".
Pa e comerciante esaki ta algo inaceptabel, no tolerabel na unda cu e mandatario a sali ataca nan publicamente na unda cu CUA solamente a expresa. "Mi ta kere nos tin libertad di expresa nos preocupacionnan y seguramente anos no ta acepta e tipo di atake aki di un minister y nos no ta bay tin miedo y nos no ta bay back-down. Y nos ta hasta te eigenlijk puntra un minister asina aki pa rectifica esaki pasobra esaki no ta tolerabel".
Su posicion ta cu CUA ningun momento a sali ataca un hende personalmente y mucho menos e minister, a bisa. E problema di DIMP ta cay bao di e Minister Maduro y ta su responsabilidad pa drech'e, a agrega.
