Otro siman Fundacion Movemento ta Bida lo tin Festival di Cancion y baile

Tin 12 participante...

ORANJESTAD (AAN): Fundacion Movemento ta Bida ta organizando e Song Festival 60 plus y su fiesta bailabel, riba otro siman, esta Diadomingo 2 di November 2025.

   Esaki ta tuma luga atardi pa anochi na Renaissance Convention Center y ta cuminsa for di 4:00 pm te cu 9:00 pm. E aña aki tin 12 participante cu un variacion den cantica y estilo. Preparacion y ensayo ta tumando luga tur siman cu hopi disciplina y dedicacion. E banda musical cu lo acompaña e cantantenan ta “Nos cu Nos”.

   E Song Festival aki ta un fundraising anual pa inverti back den proyectonan cu tur aña ta ripiti. E grupo di adulto mayor na Aruba ta creciendo enormemente. Fuera di fundraising e ta caba cu un fiesta bailabel pa los pia y pasa poco ora alegre den movecion. E otro banda musical ta We & We bou guia di Wiwi Peña. Forma bo grupo y cumpra 1 mesa pa 10 persona.

   Carchi ta costa 35 Florin pa persona, y por acudi na Cliffix pa cumpra carchi of na Oficina di Fundacion Movemento ta Bida (Edificio di IBiSA) na Eagle. Benta ta bay bon y nos ta spera di bende tur carchi. Un sala yen ta un recompensa y apoyo grandi pa e cantantenan.

  Fundacion FMTB ta gradici Directie Ouderen Zaken, UNOCA, Buurtzorg y BENU Pharmacy pa cu e sosten di e Evento aki.