Cedula ta bira 50 Florin
ORANJESTAD (AAN): Riba Diabierna atardi, e informacion a drenta cu Registro Civil y Censo cu ta atende tanto emision di Rijbewijs y tambe Cedula, lo bay hisa nan taifa.
Según nan a splica den un boletin, ta di vital importancia pa caracteristicanan di siguridad di documentonan di identidad manera entre otro paspoort, rijbewijs of tarheta di identidad, worde actualisa despues di tempo, pa asina evita cu esaki por worde imita of falsifica.
Pesey mes desde 10 januari 2022 e tarheta di Identidad di Aruba, despues di casi 20 aña, tin caracteristicanan nobo of adicional y tarifanan lo worde ahusta cual ta cubri gastonan di produccion.
E tarifa di Cedula y Rijbewijs lo ta entrante Diabierna 1 april 2022 como lo siguiente.
Cedula ta subi cu 10 Florin, y e costo nobo lo bira 50 Florin.
Rijbewijs ta subi cu 20 Florin, y e costo nobo lo bira 70 Florin.
E foyeto cu informacion tocante e caracteristicanan di siguridad di e tarheta di identidad nobo (desde 10 januari 2022) y rijbewijs nobo (desde 26 november 2020) ta online. Por lesa esey na:
Pues esnan cu tin cita entrante 1 di April 2022, tin di tene cuenta cu bo mester tin mas placa riba bo account pa haci e pago.
