Edwin Jacobs ta enfatiza
ORANJESTAD (AAN): Diabierna mainta durante un conferencia di prensa convoca pa Organo Ehecutivo di AZV, e director ing. Edwin Jacobs a splica cu e momento ey, e realidad cu e gastonan di cuido pa 2022 ta proyecta na 483,5 miyon Florin, mientras cu ta spera di haya entrada di 434,2 miyon Florin. Esey nifica cu tin un deficit di 58,9 miyon Florin proyecta pa e aña aki.
Si e esfuerzonan cu AZV a haci den cuadro di e modelo di ‘AZV 5 Wave Model’ y e recorte cu a keda imponi riba na ndi 60 miyon, nan por logra reduci e deficit aki te na 2,9 miyon Florin.
Tin di tuma nota cu riba e presupuesto di Aruba pa 2022, no tin poni e presupuesto di e pais pa cu AZV.
AZV a nota cu riba Diahuebs, e Comision di Salud di Parlamento tabatin reunion cu Representante di Cuido, y na salida cierto declaracion a wordo haci cu lo por trece panico bao di aseguradonan, y esaki sin motibo.
Pesey Jacobs riba Diabierna mainta a duna un update di e tareanan cu nan ta ehecutando, manera cu a haci tambe for di comienzo. Desde cu a asumi e responsabilidad aki na AZV, Jacobs a priminti transparencia y esey ta algo cu e ta boga pe tur momento!
EIGENBIJDRAGE: Riba e asunto di contribucion propio (‘eigenbijdrage’), Jacobs a nota cu ta creando panico den comunidad cu ta bisa cu dia 1 di April e medida ey ta wordo introduci, sin cu tin informacion y nada mas stipula.
“No tin eigenbijdrage dia 1 di April,” director ing. Jacobs a bisa. E ta mustra cu e Decreto Nacional no a cana su caminda ainda completamente.
Contribucion Propio y e cambionan riba lista positivo ta wordo introduci den cuadro di articulo 22 di Ley di AZV. Pero e ley ta indica, cu pa e Decreto Nacional aki pasa, e tin pasa door di Parlamento di Aruba y keda eynan pa 2 siman.
Parlamento no a ricibi ningun Decreto Nacional ainda, y pesey tampoco no por informa comunidad ta ki fecha e lo bay drenta na vigor, segun Jacobs a bisa.
