Otro siman Bahamas lo inaugura nan impresionante puerto pa cruseronan

NASSAU: E totalmente remodela Cruise Port na Bahamas lo habri bek oficialmente Diabierna otro siman, esta 26 di Mei 2023 y e terminal cu e Piernan a logra aumenta e capacidad di procesa pasahero for di 20.000 te cu 33.000 pa dia.

   Pa hopi decada, e ciudad di Nassau na Bahamas tabata un di e puertonan crusero mas bishita riba e planeta.  Cada aña casi 4 miyon pasahero ta bishita e ciudad aki.

   Pero no obstante hopi otro destinacion, ora e pasahero yega Nassau bo no ta haya un fabuloso bon impresion ora di baha e barco.  Semper e waf aki tabata falta di un facilidad moderno cu un terminal mester por acomoda e fluho grandi aki di pasahero.

   Awor esaki ta cambiando drasticamente, ora cu na 2016 a cuminza planea un proyecto aproba pa Gobierno, cu lo costa 300 miyon Dollar.  Porfin na final di 2019 e construccion a cuminza.  A topa contratiempo cu e pandemia, y e gastonan a subi cu 50 miyon Dollar mas.  Pero awor ta asina leu cu Diabierna 26 di Mei venidero nan por habri e prome Fase di e Terminal nobo.

   E facilidad nobo ta cubri 4,5 hectare, a construi e di seis pier, y awor por ricibi tres barco gigantesco clase ‘Icon’ pareu.  Pero e no ta djis e habilidad di mara mas barco, pasobra e compleho di puerto awor a hasta bira un destinacion riba su mes.  E tin areanan nobo pa yegada, un museo Junkanoo, lugarnan pa come y bebe, lugar pa bende, transporte pa areanan rond di e isla, y hasta un amphitheater nobo.  Pa tur hende cu a yega di bishita Nassau, nan lo bay keda impresiona cu e cambio aki.

   Y nan a percura pa e puerto nobo aki no laga pasaheronan sinti cu nan ta “atrapa den haula” manera otro wafnan den Caribe, unda terminal ta cera full cu cura di waya pa hende no drenta ni sali facilmente.  Esun nobo aki na Nassau tin acceso facil pa pasaheronan drenta e ciudad mes, incluyendo Bay Stree, Nassau Straw Market, y Parliament Square.

   E construccion nobo aki a pone cu Royal Caribbean a anuncia construccion di un Royal Beach Club, cu ta djis un tiki banda di e terminal nobo aki di Nassau, cu ta inclui beach cu piscina y palapa pa pasaheronan di e crusero.