Alabansa cu testimonio y palabra di Dios for di Hit 94 FM
ORANJESTAD (AAN): Tur cos ta cla pa aki algun dia lo tin un gran clamor pa Aruba, Caribe Hulandes, Hulanda, y mundo henter! Un evento di oracion pa 24 ora largo, yena tambe cu alabansa, testimonio, y palabra di Dios. Tur esaki presenta pa Fundacion e Fortaleza y Sosten pa Famia.
Tur cos lo cuminza riba Diahuebs Santo (17 di April 2025) for di 3:00 pm, y lo finaliza Diabierna Santo (18 di April 2025) pa 3:00 pm. E ta un marathon di Oracion den studionan di Hit 94 FM situa den Caya Ernesto Petronia, mihor conoci como e radio emisora di Johnny Habibe den felis memoria.
E aña aki ta celebra 25 Aña cu nan ta organisa e marathon na mes un lugar, dunando gloria na Dios.
E marathon aki lo tin Participacion di Aruba, Curacao, Hulanda y oto parti nan di mundo. Y ta priminti di bira algo grandi, poderoso, pa uni nos pueblo di oracion.
For di awor aki nos kier haci un yamada riba e pueblo di Aruba, Curacao y Hulanda, pa cuminsa manda nan peticion di oracion na email: This email address is being protected from spambots. You need JavaScript enabled to view it. y tambe riba WhatsApp 740-3237 of 661-9150.
Nan tin un meta pa recauda fondo pa construccion di un Rehab Center pa Damas y desde awor, durante, y despues di e Marathon of Prayerthon henter pueblo ta invita pa haci nan donacion di nan curason na Fundacion e Fortaleza y Sosten pa Famia, Bank acct na CMB 65779308.
Manera tur aña nan ta conta cu sosten di Iglesianan, Pastornan,y tambe tur intercessor, pa asina nos por cumpli cu tur peticion, pasobra nos ta altura di e plata forma grandi di oyentenan, ya cu nos lo ta riba radio, internet, y mas.
Tur caminda e marathon por wordo scucha y hasta den KIA, pa asina tur preso por scucha y ricibi oracion, hospital manera semper ta den sintonia, y nos ta cla pa ricibi tur peticion di oracion tanto local como internacional.
Tur hogar riba nos isla mester di oracion, nos tur sa e situacion social di nos isla, y tambe nos sa di e situacion social di e otro islanan, y hunto nos ta drenta den presencia di Dios.
Si bo ta campa, nos lo ta hunto cu bo, si bo ta na cas nos ta hunto cu bo, si bo ta riba laman ta pisca, unda cu bo ta nos ta hunto cu bo, pasobra a yega e tempo, pa nos uni manera salmo 133:1 ta bisa den oracion como ruman, pasobra nos tur ta sirbidor di Cristo kende ta e Salbador di nos tur. Y nos tey pa sirbi.
No lubida un pueblo den oracion, ta un pueblo den bendicion.
