Magaly Brito, Secretario General di SEPPA:
- E compania ta bisa di no tin placa
ORANJESTAD (AAN) Den entrevista cu Matutino DIARIO, Magaly Brito, Secretario General di SEPPA, relaciona cu e situacion na Arubus pa locual nan a bolbe tene accion Dialuna ultimo, el a menciona cu otro punto di discusion cu tin, fuera di e structura salarial, ta e tema di lumpsum cu mester a wordo paga pa e CAO.
“For di Juni aña pasa caba, cu a cuminza cu e combersacionnan aki cu Mediador, pa yega na un acuerdo pa alarga e CAO cu un aña mas pero di otro banda esaki a bin como un peticion for di e mesun Gerencia di Arubus, e tempo ey. Pero kico a pasa? Atrobe mi ta ripiti, gobierno a cay y e placa mester a bin for di Minister y esey ta forma parti di lo cual e minister a informa nos di a bay di acuerdo cu ne, pero e placa no a wordo poni disponible, di banda di gobierno”, Magaly Brito a señala.
El a agrega cu Arubus a indica cu no tin e placa y no por paga e lumpsum ey. “Ainda mas, na cierto momento hasta a nenga di tin un posibel acuerdo, pero e ta alarga e CAO si. Esey ta haci cu tur locual nos ta exigiendo aworaki ta pa gobierno pone e placa disponible y paga e ‘un solo suma” cu ta cubri e hecho di a alarga e CAO, of cu e partidonan no a bin na negociacion pa motibo cu a wordo pidi na nos pa alarga e CAO”, Magaly Brito a señala.
En todo caso SEPPA a wordo invita na un reunion, e siman aki, cu tin di haber cu e CAO nobo cu e mester bay negocia y yega na un acuerdo riba dje, pa 1 di Januari 2026, apesar cu Arubus ta indica caba cu nan no tin placa y si e compania no tin placa, ta gobierno tin cu pone e placa disponible. El a reitera cu Arubus a indica cu no tin placa, apesar cu e compania ta indica cu nan a bay dilanti, e contexto cu nan a cuminza genera mas entrada, pero na banda cada biaha nan tin un debe di hopi aña, pero tanten nan ta sinta duna “Golden hand shake” na ex-directornan.
