Den e ocasion aki den cuadro di e 16 dianan di activismo:
ORANJESTAD (AAN)-- E asina yama IOM Aruba (Organizacion Internacional pa Migrante) a organiza un feria di salud, tocante lo cual sra. Gonzales, Asistente di Proyecto, a duna DIARIO informacion den un entrevista.
E dama a splica cu e feria di salud regularmente nan ta haci cada pasa un luna, cu colaboracion di varios instancia, entre nan Xavier University, Famia Planea, Fundacion Aruba Solidario y IOM.
E evento aki ta den cuadro di e 16 dianan di activismo, den conmemoracion di e fecha internacional pa elimina violencia di genero y cu e aña aki tin como titulo “Ban uni contra violencia di genero”. E 16 dianan di activism aki a cuminza dia 25 di November y lo culmina dia 10 di December, cu ta Dia Internacional di Derechonan Humano.
E feria di salud a consisti di control general di colesterol, masa corporal, peso, glucemia, y chekeo di docter.
E evento tabata pa publico en general, kiermen habri pa tur hende, y ademas a duna charla tocante locual IOM ta haci, ki servicionan ta brinda, y kendenan ta colabora.
Jonathan Trinidad, coordinador di Famia Planea Aruba, tambe a duna su comentario y a menciona cu FPA a participa varios biaha caba den e feria di salud aki. FPA como fundacion, tin como meta pa duna informacion tocante salud sexual, cu ta cay bao di salud general.
E fundacion tey pa informa adulto y hoben con por tuma control di nan salud sexual, por ehemplo usando anticonceptivo, pero tambe papiando riba e aspecto di salud sexual. Tambe ta papia cu mayornan con pa trata e topico na cas, y un combinacion di varios otro tema cu tambe ta hunga un rol pa loke ta salud en general.
Pues, nan ta provee di e informacion aki y duna guia y sosten na dirigi den producto vooral, por ehemplo si tin duda encuanto productonan anticonceptivo. Asina nan ta reinforza e relacion cu Famia Planea tin cu e diferente partner NGO’s riba e meta comun aki.
Tambe Soraya Pimentel a elabora riba e feria. E ta Secretaria y recepcionista di Fundacion Aruba Solidario, y nan ta trahando hunto cu IOM y Famia Planea, y semper nan ta traha den union y duna sosten na IOM. E meta ta traha hunto y yuda e hendenan cu mester di esaki.
Seguidamente Luis Zarraga, Community Manager di La Casa del Venezolano, di Aruba Solidario. El a splica cu La Casa del Venezolano ta un proyecto pa brinda apoyo na tur e organizacionnan local y internacional. Esaki ta di cuater of cinco Feria di Salud cu nan ta participa tambe, pa apoya den e caso aki hopi hende cu nan documentonan no ta den regla, y no por bay docter pasobra tin cu paga sumanan grandi.
El a agrega cu danki na Xavier University nan por atende e personanan cu tin un urgencia di atencion medico. La Casa del Venezolano ta apoya nan cu e traductornan, ya cu e docternan di Xavier ta sea Hindu of Mericano, y e Idioma ta fundamental.
{gallery}Organizacion IOM hunto cu Famia Planea, Aruba Solidario y Xavier University a organiza nan Feria di Salud{/gallery}
