ORANJESTAD (AAN): Organizacion Caballista Arubano ta invita pa e prome competencia pa aña 2024, Feria Himno & Bandera.
Esaki ta awe Diasabra 23 di Maart pa 6:00 pm, y lo cuminsa cu competencia di cabay di Paso Fino, Trocha, Trocha & Galope, y Trote & Galope.
E anochi aki lo mira un Gran Campeona di Paso Fino nobo, mirando cu e dos ultimo Gran Campeonas no lo ta participando, habriendo caminda pa un otro yegua corona cu e titulo maximo. Tambe lo mira e debut di diferente cabay.
DIARIO a compronde cu Diadomingo 24 di Maart pa 4’or lo tin competencia pa jinete y amazona, caminda nos muchanan lo demonstra nan habilidad den e arte di equitacion. Akinan tambe den categoria principiante lo tin amazona nobo ta competi.
Competencia lo tuma lugar na Villa Floralina situa na Moko, entrada ta gratis cu un bon bar y cushina. E Feria lo worde juzga pa Hueznan Dr. Maria Consuelo Villamizar di Colombia y sr. Juan Zuleta di Aruba.
