ORANJESTAD (AAN) – Gabriela Zambrano ta un di e organisadornan di EXPO Health Aruba, cu ta bay tuma lugar Diadomingo 29 di September awo, na Hyatt Place Airport, di 10 or di mainta pa 5’or di atardi.
Zambrano a menciona cu e tin hopi aña ta traha riba tereno di nutricion y bienestar na Aruba, y e ta forma parti di un grupo di coach certifica, cu ta organizando e Expo Health aki.
Nan meta ta pa pueblo di Aruba brinda un tiki mas di atencion na su salud y bienestar. “Nos ta un grupo cu ta motiva bo, ta duna bo un plan di alimentacion, y debido na e peticion di e personanan cu kier ta bon, a surgi e expo salud aki.
“ E expo aki ta un exito y Zambrano kier a yama danki na tur e participantenan cu a confia den nos. Nos tin como 50 pa 60 compania cu ta bay bin e dia aki, pa expone tur cos novedoso pa nan, como persona, lo no ta inventando cosnan straño pa nos salud, pasobra tur cos ta prevencion”, Fabiola Zambrano a señala.
El a reitera cu ta bay tin un area comercial unda lo ta presente varios compania pa ofrece nan productonan cu ta riba mercado, lo tin un parti di seminario cu personanan experto, profesionalnan den nan area.
“Nos ta bay tin actividadnan, lo tin un parti di ehercicio unda lo bin diferente entrenador cu ta bin di diferente gym di Aruba, p’asina pa 10, 11, 12 or mainta tin diferente actividad, pasobra esey ta locual nos kier, pa e personanan sinti nan mes contento y alegre di haci tur esaki como prevencion y hobby”, el a menciona.
Zambrano kier a invita pueblo di Aruba pa no perde e oportunidad aki. El a reitera cu entrada ta gratis, pa yega trempan pasobra pa e prome 250 persona no lo paga pa stacionamento. Lo tin cuminda saludable, testing, varios compania ta presenta nan productonan.
“Nos a ripara cu Aruba ta riba bon caminda caba, tin hopi apoyo, e ta manera un tendencia unda tur hende ta papia di ta bon, saludable, ta haci caminata na aire liber, etc. Nos ta motiva e personanan pa nan tin un bida activo y saludable”, e dama a reitera.
