JaIken Antonia tin un bon programa pa logra e meta:
ORANJESTAD (AAN) – Señor JaIken Antonia, di Stichting Ja Ik Aruba, ta splica tocante un fondo cu su fundacion a ricibi for di Oranje Fonds, pa yuda un grupo di hoben cu ta participando den e programa di e Fundacion aki.
Esaki ta dirigi na hobennan cu no tin trabao y no ta bayendo scol, pa nan haya un trabao pero mas importante ta cu nan por traha riba nan mes, den nan desaroyo y liderazgo personal, etica laboral, compatibilidad, y nan por yuda nan famianan mes.
Señor JaIken a informa cu e Fundacion a cuminza yuda e aña aki, y tin algun participante. “Nos ta bezig pa cinco siman y nan a experiencia un cambio caba. Esaki ta hopi positivo, nan mes ta bisa cu esaki ta tremendo y cu ta na Aruba.
E tipo di hobennan cu e ta yuda ta eigenlijk tur hoben cu tin e edad di 18 pa 35 aña. “Mi tin hobennan cu no a caba nan MAVO of Colegio, of cu a drop out. E Fundacion ta yuda nan pa nan conoce nan mes miho, y busca un trabao cu ta fit cu nan.
“E tipo di hoben cu mi ta buscando ta esun cu ta bisa ‘mi kier siña, mi tin e hamber, mi kier bay dilanti’. E no ta costa ningun florin, e ta por nada, pero mi kier wak nan training. Dos biaha pa siman tin training, nos tin coaching, nos ta bishita companianan, pues esnan cu tin hamber pa siña, tin cu tey tur biaha”, JaIken Antonia a subraya.
E programa aki ta dura cuater luna y ya caba un par di hoben a bay pa atende entrevista di trabao, y nan a haya oportunidad di haci un stage di prueba, y si nan gusta nan tin e oportunidad di cuminza cu e trabao. Tin un hoben cu gusta IT, y e ta bezig cu “codering” y ya caba meneer Antonia a contact diferente compania cu por ta compatible. Como cu nan ta bishita diferente compania, e hobennan por conoce nan miho wak cual ta fit miho cu ne of no, segun señor Antonia.
E Fundacion tin diferente video riba facebook di “Stichting Ja ik Aruba”, tin entrevista y testimonionan, y por subi na su website: Ja Ik Aruba. Hobennan por yama y señor JaIken Antonia ta dispuesto pa yega te nan cas, of bario y ta papia cu e hoben of su famia, y splica tur cos.
