Esther Broeksema di FCVR:
ORANJESTAD (AAN) Manera ya ta tradicion di tur aña, cu e campaña di Orange the World ta inicia cu e ceremonia di luz na Bestuurskantoor. Esaki ta tuma luga diabierna 20 di november, pa 6:30 di atardi, na Bestuurskantoor. Minister di Asunto Social, Mervin Wyatt-Ras, lo habri e campaña cu un discurso riba e lucha contra violencia contra hende muhe y mucha muhe.
Esther Broeksema, presidente di Fundacion Contra Violencia Racional (FCVR), hunto cu e partnernan di Orange Aruba, ta extende un invitacion cordial na pueblo di Aruba pa asisti na e ceremonia.
Durante e 16 Dianan di Activismo, di 25 di november te 10 di december, e partnernan lo ofrece varios actividad di conscientisacion. E programa ta inclui un simposio organiza pa Centro di Desaroyo di Hende Muhe (Cedehm), e Orange Awareness Carousel di Soroptimist International Club Aruba (SICA) y tayernan riba relacionnan saludabel pa hobennan, facilita door di Departamento di Asunto Social (DAS). Tambe lo tin un lectura di Clementia Eugene riba abuso sexual di mucha.
Broeksema a agrega cu otro gruponan den comunidad tambe lo organiza actividadnan di conscientisacion. Un di e iniciativanan aki ta Ride to Be Heard, un ride pa hende muhe organiza pa Sinnerz Women’s Motorcycle Club (WMC) Aruba bou di e lema Her Voice, Our Roar. E ride lo tuma luga dia 28 di november. Inscripcion ta habri caba via pagina di Facebook di e club.
E comision di Orange Aruba ta invita pueblo pa asisti na e ceremonia di luz y participa den e actividadnan di conscientisacion. E ceremonia lo reuni comunidad bou di un mensahe di speranza. E simposio, e tayernan y e lectura lo duna participantenan espacio pa papia di violencia, siña reconoce su señalnan y comparti maneranan pa preveni abuso.