Wever-Croes: Ministernan tambe tin derecho riba vacacion
ORANJESTAD (AAN): Prome Minister Evelyn Wever-Croes a tuma nota di e criticanan cu tabata tin siman pasa relaciona cu e viahe cu el a haci, cual tabata di trabao, como tambe e viahenan priva di e dos ministernan di RAIZ, Ursell Arends y Geoffrey Wever.
El a indica cu e coleganan cu a viaha pa motibonan priva of pa vacacion ta cosnan cu nan tin derecho riba dje. "Nan ta hende, nos tur ta hende ya yega un momento cu bo mester di un break pa bo por recarga".
Wever-Croes a manifesta cu e ta spera cu pronto e tambe por haya e chens di tuma algun dia liber pa por recarga pasobra e temporada tras di lomba tabata un temporada hopi pisa, intenso y sin descanso.
A bisa cu nan ta minister berdad, pero esey no ta haci nan inhumano, a bisa.
Articulo 8 di e reglamento di orden di Conseho di Minister ta stipula cu ora un minister ta viaha of e ta pafo di Aruba, e ta notifica Gobernador pa cuanto dia y pa cuanto e ta bay, a remarca.
Ta informa Gobernador di e viahenan, sea ta priva of trabao. Aparte di esey a dicidi cu ta informa Parlamento ora cu ta viaha pa trabao, a splica.
Den pasado tabata informa parlamento ora cu tabata trabao y priva. Pero Parlamento e tempo ey, cierto parlamentarionan di AVP no tabata tin e madurez suficiente pa por a procesa e informacion y tabata haci weganan infantil cu esey, Wever-Croes a indica.
A bay bek na e reglamento di ordo y ta mira cu mihor ta duna parlamento e informacion cu parlamento mester y esey ta ora cu e ministernan ta viaha pa motibonan di trabao, cual den su caso el a haci.
Cu e viahenan a causa conmocion, e ta lamenta, pero mester corda cu cada minister ta keda hende y tin mester leu leu di por tuma un break, un vacacion of tambe bay den exterior pa regla algun asunto priva, e mandatario e señala.
