Minister Dangui Oduber:
ORANJESTAD (AAN) – Minister di Turismo y Salud Dangui Oduber, a bisa den conferencia di prensa cu un bez cu e sistema di digitalizacion, pa loke ta trata peticion di permiso y otorgamento, na sector di Horeca y hotelnan ta cla, e siguiente proceso ta pa separa (koppel los) Hygienische Dienst (cu ta esun encarga pa haci e control) for di Polis y Brandweer.
Ya caba a tuma un decision di Ministerraad pa e bira un suigeneris, y e meta ta pa e traha mas eficiente, tin mas transparencia pa e clientenan, y mehora e clima di haci negoshi na Aruba.
“Tambe nos kier yega na un data ‘Intelligent driven Island’ unda nos tin e datanan disponible di no solamente esnan cu tin permiso di restaurant, tur cos inclui, hotel y tambe otro acomodacionnan.
“Cu esaki nos ta ehecutando e puntonan di accion di un rapport cu a wordo traha algun aña atras door di ATA, cu yama ‘Mira pa futuro’. Y tambe nos ta ehecutando loke ta para den e Landspakket, y loke nos kier haci ta ‘trek recht’ tur esnan cu a opera sin vergunning e ultimo añanan, cu no tabata cumpli, pa asina tur hende tin cu cumpli cu tur e rekisitonan cu ta wordo stipula den cualkier vergunning cu ta wordo otorga, pa asina nos tin un miho control y sigur tambe un miho supervision, riba e cantidad di permisonan cu ta wordo otorga, por ehemplo den caso di hotelnan”, e dignatario a splica.
El a agrega cu ora un hende haya un hotel vergunning, e ta wordo otorga pa opera “x” cantidad di camber, pero tin biaha den practica ta resulta cu hotelnan tin mas camber di loke nan tin permiso pe y, naturalmente, mester paga pa e extra cambernan ey. Y ta pesey tambe, ta bay independisa e departamento menciona, pa asina por cumpli cu tur e puntonan cu a wordo menciona pero primordialmente, percura pa tin un miho clima di inversion y elimina e burocracia of 'red tape'.
E mandatario ta spera cu e proceso sigui cana manera e ta bayendo pa asina den e tres of cuater cuartal lo por lanza esaki oficialmente, y ora esaki sosode lo tin mediante e web portal, un 'live check' y un 'help desk' pa asisti tur e comerciantenan cu ta haci peticion y kier ricibi su permisonan.
