Ora cu ta trata cu personanan cu limitacion mental mester tin pasenshi y comunica den frasenan cortico

Curso ‘Beperkingen en Mogelijkheden’

ORANJESTAD(AAN): Despues di e curso di Wit Gele Kruis yama ‘Beperkingen en Mogelijkheden’, prensa a logra papia cu psicologo Nataly Li-Martina tocante e curso.

El a splica cu el a bin for di Corsow pa duna e curso pa hendenan cu den nan trabao por tin cu atende cu personanan cu limitacion mental leve.

“Como psicologo nos ta haya nos confronta hopi di e personanan aki y pesey WGK a acerca nos pa duna un curso na diferente stakeholder na Aruba, cu den practica ta traha cu personanan cu limitacion”, segun Li-Martina.

E psicologo a splica cu durante e training di 2 dia a duna un guia, con pa traha cu e personanan cu limitacion mental.

Logopedista Heidy Simon tambe a duna parti di e training y el a splica cu un di e cosnan importante cu a para keto na dje ta comunicacion, esta kico bo tin cu tene cuenta cune ora cu bo tin cu comunica cu un persona cu tin un limitacion mental leve.

Un ehempel cu Simon a duna ta cu ora cu bo papia cu personanan cu limitacion mental leve, bo mester papia den frasenan cortico, por ehempel di no mas cu 5 palabra.

“Ora cu bo papia cu un persona cu limitacion mental, e informacion mester wordo parti na pida chikito cada vez y no a storia completo cu e persona lo tin dificultad pa compronde”, segun Simon.

El a bisa si cu ta importante pa remarca cu ora cu ta atende cu persona cu limitacion mental leve, no ta enfoca solamente riba e posibel problemanan, sino tambe riba nan talentonan, esta riba e cosnan cu e cliente por haci bon.

“Door di enfoca riba e areanan aki, nos ta fortalece e cliente y nos ta yude pa e aplica su fortaleza den otro areanan di su bida”, segun Simon.