Ora bo yiu yega cas cu su rapport… 

Fundacion Pa Nos Muchanan - Articulo di siman

Bo yiu ta den e ultimo simanan di scol y bo yiu ta haya su rapport…

Dianan cu bastante tension pa mayoria mucha y mayor. Un mal rapport no mester bin como sorpresa. Durante e aña escolar bo por ripara y haya señalnan. Pa e motibo aki ta importante pa sigui bo yiu su prestacion y sosten’e durante henter e aña escolar. 

Con abo ta reacciona ora bo yiu yega cas cu su rapport? 

“Bunita rapport, pabien pero mi no a spera otro”.

Tin mucha cu semper ta haya un bon rapport. Pero un bon rapport no ta bin di mes. Corda cu e mucha a traha pe. Miho bisa: …”Waw, bunita! Abo a logra esaki, hopi bon! 

“Bon trabou! Ata 50 florin pa bo cumpra algo!”

Recompensa un mucha cu placa pa su bon rapport no ta mal idea pero e ta envolvi risico. Mucha por cuminsa siña pa haya placa. Ora no tin placa, no ta presta. Miho dun’e un regalo creativo of educativo manera un wega di mesa, un set di verf cu kwashi of dune un sorpresa di bay come cu ne na un restaurant. No lubida di dun’e un brasa di elogio! 

“B’a wak...mi tabata sa! Unda bo kier bay cu un rapport asina?”

Aunke con bon of malo e rapport ta, semper cuminsa wak loke ta bon. Despues sigui cu e puntonan menos bon y puntra dicon. Laga bo yiu splica su rapport y purba wanta bo opinion te ora e caba di splica. 

“Lubida vakantie!...Bo ta bay haci rekenen tur dia!”

Menasa y straf no ta yuda ora e rapport sali malo. Un reaccion asina ta haci siñamento bira un straf pa e mucha. Tuma contacto cu e maestra di scol y purba compronde dicon esaki a sosode. Laga bo yiu bin cu ideanan con e por mehora su rapport (p.e tur diabierna den vakantie mi ta lesa un buki). Asina bo ta haci e mucha responsabel pa su comportacion y prestacion. Djis mand’e bay haci rekenen, no ta funciona. Elo bai hunga asina cu e haya chens. 

“Si bo a haci bo best, mi lo a duna bo un celular.”

Esaki ta un reaccion peligroso. Imagina cu bo yiu a haci su best y ela haya un 6 pa rekenen. Bo ta dun’e e celular of no? Si bo kier duna bo yiu un recompensa, haci’e pa su esfuerso. 

“Wak e raport di bo ruman, e si a haci su best!”

Miho puntra bo mes un rato kico ta un mal rapport pa bo yiu. Maske abo no gusta su rapport, podise p’e e no ta dje malo ey. No compara su rapport cu esun di su ruman of otro mucha sino cu loke bo yiu por (su capacidad), su rapport anterior (tin crecemento?) y su esfuerso (con duro bo yiu a traha?). 

“Haci bo best, esey ta bon pa bo futuro”.

E reaccion aki no ta motiva e mucha. Futuro ta algo dificil pa bo yiu imagina. Splic’e pakico e mester por haci rekenen of pakico e mester por lesa. Si e mucha compronde esey, e lo haya mas gana pa haci su best. 

Tanto mayor como mucha ta sinti emocion ora haya rapport. E prome reaccion por ta contento, desapunto, alivio of rabia. Pero semper mester busca un manera pa sigui pa dilanti. Zundra y parti straf ta baha e auto estima di bo yiu y no ta siñ’e carga responsabilidad pa su propio futuro. E capacidad di bo yiu hunto cu su esfuersonan ta loke ta conta.

Cuminsa cu scucha bo yiu. Si su rapport ta malo, puntre si e por splica dicon y con e mes ta sinti di esaki. Puntr’e kico mester cambia pa e mehora su rapport y sosten’e mas tanto posibel. Elogi’e pa loke ela haci bon. Esaki ta yud’e mantene su auto confiansa y purba atrobe.  

Fundacion Pa Nos Muchanan ta desea tur mucha un dushi vakantie! 

Fuente: basa riba articulo: “Geen straf bij slecht rapport” www.goedgevoel.be y www.klasse.be/ouders
Pa informacion of pregunta por acerca Fundacion Pa Nos Muchanan - Cumana 2