Stanley Dabian di Departamento di Cultura
ORANJESTAD (AAN) – Stanley Dabian, Relacionista Publico di Departamento di Cultura Aruba (DCA), den conferencia di prensa a duna informacion tocante e Premio Nacional di Teatro, y Reconocemento Nacional di Teatro.
“Departamento di Cultura Aruba, ta mira cu teatro tin un balor hopi significante den e historia cultural y artistico aki na Aruba, y tur dia nos ta comproba esaki ora nos ta mira asina tanto artista hoben, chikito y grandi ta destaca grandemente, pa nan forma di dominio di expresion, capacidad di interpretacion, talento, tecnica y poder creativo”, Stanley Dabian a expresa.
Por tende di nan ya sea den actividadnan publico y priva y diferente programa cultural realiza, a unda nan ta demostra nan talento, tanto na nivel nacional como internacional, convirtiendo nan mes den embahadornan cultural y crea motibo di reconocemento y orguyo pa nos tur.
Dabian a relata cu un cantidad di artista y gruponan local, dia pa dia ta destaca y cu hopi creatividad. “Nos sa cu e momento di pandemia a trece un cambio den esaki, pero cu genuinidad y excelente domingo tecnico, nan ta briya riba escenarionan”, Dabian a señala.
Tambe DCA ta mira cu exitosamente, habilidad y experencia ta resalta den tur disciplina artistico.
“Departamento di Cultura su prioridad di educacion di arte y cultura, ta wordo stimula pa medio di proyectonan, manera competencia di arte y palabra, y Gang di Arte, cualnan ta sirbi pa nos hobennan descubri y sigui desaroya cada aña nan talento creativo y artistico. Sigur tambe, ta fomenta e bon uso di nos Idioma Papiamento”, Stanley Dabian a señala.
El a agrega cu esaki tambe ta un yamada pa tur autor di obra di teatro, pa corda ora nan skirbi nan obranan, skirbi nan den bon Papiamento pa asina ey, e participantenan y tur hende por disfruta di nos Idioma y di Aruba su talento cu “bida ta teatro”.
Dabian a menciona tambe cu relaciona cu Dia Mundial di Teatro y Premio Nacional di Teatro, tin como grupo meta, tur profesional, amateur y amantenan di teatro, y ta habri e oportunidad pa nan wordo reconoci pa nan trabao. Tin hendenan produciendo incansablemente, profilando den e maraviyoso mundo di teatro.
DCA conhuntamente cu Ministerio di Cultura y UNESCO Aruba, pa mas cu 15 aña consecutivo, riba dia 27 di Maart di tur aña, ta celebra e Dia Internacional di Teatro, unda tur gremio artistico ta uni nan mes den e celebracion, pa asina un y tur por duna teatro e balor cu e merece den nos comunidad. E celebracion di Dia Internacional di Teatro ta iniciativa di Instituto Internacional di Teatro y UNESCO y for di aña 1961 a wordo crea pa e Instituto Internacional di Teatro pa e dominio di arte escenico.
Criterio pa evaluacion di e nominadonan, mester ta un persona of grupo sin ningun clase di distincion cu ta trahando riba tereno di teatro y cu pa nan trayectoria y excelente trabao a sa di marca historia y cu nan esfuerzo a sa di planta respet den nos comunidad, entregando asina nan amor, pasion y aprecio pa e arte di teatro.
E premio aki por wordo otorga tambe na un persona cu a fayece, cu a cumpli cu e rekisitonan ya menciona, y cu su famia of un representante lo recibi e reconocemento postumo aki tambe.
DCA a participa cu for di e momento aki ta keda habri e oportunidad pa por nomina, pa aña 2022, esnan cu a sobresali y a traha duro den nomber di e bunita arte di Teatro, y hiba nomber di Aruba na halto.
