ORANJESTAD (AAN): Diasabra cu a pasa a observa Dia di Labor. Ministro Glenbert Croes, a duna su reflexionnan riba dia di Labor como Minister di Labor.
“Si mi mira con desde cu Gabinete Wever Croes a huramenta 17 di november 2017 a logra na:
Na 2017: A para tur ontheffing y a promove trahadonan local na prome luga, profesionalnan local na prome luga, contratistanan local na prome luga pa nos yiunan di tera ta e protagonista di e desaroyo y futuro nobo cu nos ta desea pa Aruba. Danki na e maneho aki di Minister Glenbert Croes, den 2018 a logra reduci cifra di desempleo for di 8.9% hereda na 2017 te na 5.2% den 2019 danki na e maneho di localnan prome.
Cu e ser humano central y bienestar en general di tur trahado y nan famia na prome luga, e mandatario a logra aumenta salario minimo 2 biaha te na 1.815,35 Florin. Lamentablemente e crisis ocasiona pa Covid-19 a bati na nos porta derumbando tur locual cu Gabinete Wever Croes a bin ta construyendo. 13 di maart e prome dos casonan a worde raporta y aki ta unda tur hotel y tur negoshi a dal nan luga cera. Di anochi pa mainta tur a dal luz paga sin sa kico ta bay pasa mañan.
Pero aki ta unda cu Minister Glenbert Croes como e titular di Labor a cuminsa reuni cu tur gremionan y pa 19 di maart a anuncia introduccion di FASE. E mandatario tabata determina pa sali cu un ayudo financiero pa tur cu a perde trabao. Glenbert Croes a introduci un ayudo cu por cierto ta Aruba so a conoce, pa por yuda nos hendenan sobrevivi e crisis di mas horibel cu Aruba a yega di experencia. Cu nos hendenan den mente Minister Glenbert Croes a tuma e decision y ta introduci FASE. Ya mientras casi 12 mil hende a ricibi e ayudo aki for di Maart 2020.
A introduci FASE di 950 Florin pa esnan cu a perde trabao y ta pagando 60% di Subsidio di Salario pa mantene hende na trabao y proximamente na juli di 2021 lo introduci TIO cu ta un ayudo temporario di entrada cu lo varia entre 1.250 Florin te cu maximo 2.950 Florin.
Manera e mandatario a expresa; "Gobierno no ta bira lomba pa bo. Gabinete Wever Croes ta kere den pone e ser humano central, e trahado central honrando e sacrificio y esfuerso cu tur hende a haci. Pa Aruba para back riba pia, tur trahado mester para back riba pia". Esey ta e mision di Minister Glenbert Croes den su proximo gobernacion.
